2130/2023-2024

LUNGLEI; the 3rd, 2023: Vawiin chawhnu dar 2:00 khan National Wildlife Week vawi 69-na pualin Govt. J Buana College, Lunglei-ah hun hman a ni.

He hunah hian Pu PC Lalchhandama,DFO, Lunglei  chuan powerpoint presentation hmangin college zirlaite hnenah nungchate leh an chenna ramngaw pawimawhna leh inlaichinna hrang hrang bakah mihringte damkhawchhuahna atana an pawimawhnate a sawi fiah a. Ramngaw leh nungcha humhalh chu mitin mawhphurhna a nih thu leh thil har lutuk a nih loh thute, an awmdan anga khawih buai loh hi hmuhalh dan tha ber a nih thute a sawi a. Hei bakah hian pi leh pu atanga ngaihdan diklo leh puithuna kan la chhawm thenkhat  Savawm leh saphai mit pumna leh thildang atan a tha nia ngaihnate, Saphu kawr naupang awmna tan a tha nia ngaihnate, Hauhuk ruh bun ruh damdawia ngaih tlatnate, tunlaia rannungseh natna atana rulsa a tha nia intihhmuh mekte leh thildang tamtak kan sim a pawimawh thu pawh sawiin hmanlai kan pi peh pute hunlai chuan duhthlan tur dang a awm chuan loh avangin hetiang ngaihdan an lo kalpui pawh hi engemaw chenah ngaihthiam theih a nih thu leh tunlai hun, damdawi dang tha tak tak awm tawh hnuah hi chuan kan thlauhthlak a hun tawh thu a sawi.