2129/2023-2024

Aizawl The 3rd of October, 2023: Vawiin khan Taxation Auditorium, MINECO-ah Pu Lalchamliana, Home Minister chuan Kum 2018-2023 inkar chhunga Home Department Achievement Report a bu a an siam chu a tlangzarh.

Home Minister chuan a department enkawl Secretariat leh Directorate lama officials tha tak tak zarah kan mawi a ni tiin thinlung takin department hnuaia thawktu zawng zawngte chungah lawmthu a sawi a. Home department chu tuifinriat ang deuha thil engkim luankhawmna a ni nachungin thawktute zarah kan hmazawna thil awm kan tifel thei zel chu hlawhtlinna ropui tak a ni a ti. Hripui leng avanga Police recruitment thar lak theih a ni hrih lo chu pawi a tih thu sawiin compassionate ground hnuaiah erawh mi eng emaw zat lak an ni chu lawmawm a tih thu a sawi bawk. Mizoram Police-ah Quality tha a awm theih nan theihtawpchhuah zel a nih thu sawiin kan Police te traffic emaw policing leh ramri ven kawngah an chhuanawm tak zet a, an kal zelna turah duhsakna ka hlan a ni a ti. Mizoram chu State naupang kan la nih avangin revenue lak lamah kan la pachhia a, chuvangin Central zai ngai chunga kan kal a ngai a, State lian zawk nen tehkhin rual kan ni lo nain theihtawp erawh kan chhuah vel zel a ni a ti.

Pu Joseph Lalramsanga, MCS, Addl. Secretary, Home Department chuan 2018-2023 chhunga Achievement report a bu-a an buatsaih dan tlangpui a tarlang a. Editorial board indinin Home Department hnuaia Directorate hrang hrang Forensic Science Laboratory, Sainik Welfare & Resettlement, Mizoram Home Guards & Civil Defence, Prisons, Fire & Emergency Services bakah PHQ atangin an hnathawh leh hmalaknate chu a bu chhungah hian dah luh a nih thu a sawi.

He hunah hian Home Department hnuaia Directorate hrang hrangte'n Report tawi pein Forensic Science Laboratory chungchang Pu H. Sangchungnunga, Director, FSL chuan a tarlang a. Surgeon Lieut. Lalnuntluanga, Director, SW&R chuan Sainik Welfare & Resettlement chungchangah report pein Maj. Zosangliana Hualngo, Commandant General cum Director, MRG&CD chuan Mizoram Home Guard & Child Defence chungchang a tarlang a. Pu R. Lalremsanga, MCS, IG, Prisons pawhin Inspectorate of Prisons chungchangah report a pe a, Fire & Emergency Services aiawhin an Director Pu Zosangliana, MPS chuan report a pek bakah PHQ hnuaia Mizoram Police chungchang Pu Ajay Chaudhury, IPS, ADGP Mizoram chuan a tarlang bawk a ni.

Pu Ajay Chaudhury, IPS, ADGP chuan Mizoram Police chakna leh hlawhtlinna tilang bertu chu remna leh muanna kan ramin a neih hi a nih bakah Mizoram mipuite'n police force hnena rinna an nghah ngamna hi a ni a ti.

Special Invitee CYMA atangin Pu Fabian Lalfakawma, Treasurer pawhin thu a sawi bawk.

He hunah hian Pu Lalengmawia, IAS, Commissioner & Secretary, Home Deptt. chuan kalkhawmte lawmna thu sawiin Pu Paul L. Khuma, MCS, Deputy Secretary, Home Deptt. chuan kalkhawmte chungah lawmthu sawiin hun a khar a ni.