2128/2023-2024

Dated Serchhip, the 3rd October, 2023: Vawiin khan Serchhip Bukpui-ah Social Welfare & Tribal Affairs Minister Er. Lalrinawma chuan District Social Welfare Officer (DSWO) Office leh Women & Child Development Directorate hnuaia District Programme Officer (DPO) Office thar a hawng.

Er.Lalrinawma chuan Department Office thar hawn chu thil hautak leh office thar hawn a nih theihna tura thil buaipui ngai a tam thu sawiin, Office thar hawn a nih theihna tura chak taka hma latute chungah lawmthu a sawi. Social Welfare Minister chuan sawrkar Department pawimawh tam tak zingah mihring mamawh kimna leh office pawimawh ber te zinga mi, District Social Welfare Officer (DSWO) Office leh District Programme Officer (DPO) Office thar hawn a ni thei ta chu lawmawm a ti a. Serchhip District chuan rahbi thar pawimawh tak a chuang kai a ni tiin, thinlung takin a lawmpui tih a sawi a, tluang taka Office kalpui chhoh a nih theih nan duhsakna a hlan a ni.

Kum Upa leh Tar te tanpuina sum lo kal bahlah leh zauh thin chungchang Minister chuan he hunah hian a sawi lang a. Hei hi Central sawrkar lamin inkaihhruaina (Guideline) an siam danglam vang a nih thu a sawi. Er. Lalrinawma chuan India ram hnam tinten kan hnam nun leh culture kan inzahtawnsakna tura hmalakna chu sawrkar laipuiin a ngai pawimawh hle a, State Sawrkar pawhin theihtawpin tan a la a, he hmalakna a hlawhtlin theih nan mipui mimir kan pawimawh hle a ni, a ti bawk.

Serchhip-a DSWO leh DPO Office hawnna programme hi Serchhip Bawrhsap Pu David Lalthantluanga chuan kaihruaiin, kalkhawmte lawmna thu a sawi a. Serchhip District in District Social Welfare Officer (DSWO) Office thar a nei ta leh District Programme Officer (DPO) Office thar an luah lum dawn ta chu lawmawm a tih thu sawiin, Serchhip District mipui te tan hmasawnna bung thar pawimawh tak a nih thu a sawi a. Hemi atana hmalatu SW&TA Minister chungah lawmthu a sawi a ni.

He hunah hian Social Welfare & Tribal Affairs Director Dr Lalhriatzuali Ralte IAS chuan Serchhipa District Social Welfare Officer (DSWO) Office & District Programme Officer (DPO) Office hawng tura hma an lak chhoh dan sawi a. An Department hmalakna leh hnathawh dan kalphung tlangpui te a sawilang bawk a ni.

SW&TA Deputy Director Dr. R.Lalnunmawii’n Technical Report pe in, Report atanga a lan dan chuan Office atana luah theih turin Govt Bukpui M/S building hlui chu tunhnaiah chei that a ni a. Hemi atan hian cheng nuai 4 chuang sen a nih thu a sawi a ni.

Women & Child Development hnuaia DPO Office hi nikum December thla atang khan Serchhip-ah mimal In luahin bul tan a lo ni tawh a, vawiin khan Office thar hawnna hi neih a ni ta a ni. District Social Welfare Officer (DSWO) Office erawh Serchhip-ah hian a la awm ngai lo va. Vawiin khan Minister Er.Lalrinawma hian a hawng ta a. Heng Office pahnih te hian Govt Bukpui M/S building hlui cheithat hi hun engemawchen an luah lai lawk ang a. Bukpui ramah vek hian Office building thar sa turin ruahmanna kalpui mek a ni.

Serchhipa  District Social Welfare Officer (DSWO) Office leh District Programme Officer (DPO) Office hawnna Programme-ah hian Department-a thawktute bakah Chhiahtlang, Bukpui leh Serchhip khawtlang hruaitute an tel a. Women & Child Development Deputy Driector Pi Sailopari’n lawmthu sawiin programme hi a khar a ni.