2127/2023-2024

Vawiin khan School Education Minister Pu Lalchhandama Ralte chuan Ṭinghmun VC ten 7th Tuivawl MLA Cup champion an nih lawmna Ṭinghmun Community hall-a an buatsaih chu khuallian niin a hmanpui.

Minister chuan he hunah hian thusawiin MLA Cup Championship tournament khelhah Ṭinghmun khawtlangin Football player-te an ṭawiawm ṭhatzia sawiin an champion avanga Ṭinghmun khawtlang lawmna leh hlimna chu hmuhnawm a tih thu leh thinlung takin an lawmna a ṭawmpui tih a sawi a, infiammite chu an thiamna leh theihna vawngṭha turin a chah. Minister chuan vengdang tlangval inkhel thiam te lakluh theih ni mah se, chutiang la lut lova he khaw tual tlangvalte ngeiin tournament an khel a, hnehtu an ni thei chu ropui zual a tih thu a sawi bawk.

Minister chuan hmar tlangdung tan infiamna lama hmasawn zel nan Darlawn Football ground-ah grass phah a ni dawn a, cheng nuai 200 chu sanction a ni tawh a ti a. Hmar tlangdungah rambuai avangin hmasawnna a kal chak thei lo tih sawiin tunah erawh chuan ram ralmuangah tlangdung hmun hrang hrangah sorkarin hmasawnna hna a thawh te hmuh tur tam tak a awm ta a, infiamna bakah kawng hrang hranga hmasawnna a kal chho zel dawn a ni a ti. Ṭhalaite chu taksa tichhe thei ruihtheih thil chi hrang hrang lakah inthiarfihlim a, invawng uluk tur leh practice taima turin a chah bawk.

Pu Lalmalsawma Darngawn Chairman, SHC pawhin thu sawiin MLA cup lak chu thil ropui leh lawmawm tak a ni a ti a, Zoram pum huapa champion ni thei turin ṭhalai infiammite a fuih a, taksa hriselna tibuai thei laka inthiarfihlim turin a chah. Zoram pumah Mipa thi an tam dan leh a pawi dan sawiin ruihhlo leh HIV/AIDS avanga thi an tam hi a pawi hle a ni a ti a. Ṭhalai rual kalkhawm te chu inngaihtuah harh turin a chah a ni.

7th Tuivawl Constituency MLA Cup Football tournament hi June 1-17, 2023 khan Ratuah khelh a ni a, Ṭinghmun VC team te hi an champion a ni.

MLA Cup champion lawmnaah hian Shinlung Hills Council hotu ṭhenkhatte, infiammite, khawtlang hruaitute,  khawtlang mipuite, tlawmngai pawl hruaitute leh sikul naupangte an tel a ni.