1066/2023-2024

Khawzawl, the 7th July, 2023: Deputy Chief Minister Pu Tawnluia chuan vawiin chawhma dar 11 khan Union Bank of India (UBI) Branch thar Khawzawl Zaingen Vengah khuallian niin a hawng.

Khuallian Pu Tawnluia chuan Khawzawl District pian atanga hmasawnna hrang hrang siam chhoh mek zingah banking lama hmasawnna pawh ngaihtuah tel a nih thu sawiin, Khawzawla bank awmsate bakah mipui leh Sawrkar Department-te tana chhawr tangkai theih tur bank upa tawh tak, bank lian zinga hma la tha leh core banking solution, computer hmanga bank thuam vek kawnga hmala zo hmasa ber Union Bank of India hawnfel a ni ta chu lawmawm a tih thu a sawi a. Union Bank of India hawn a nih theih nan kum 2020 ah daih tawh hmalak tan a nih tawh thu leh anmahni lam ngei pawhin zirchianna leh enfiahnate an neih thu a sawi a. Bank Branch hawn mai bakah a kentel ATM pawh hun reiloteah peihfel thuai beisei a nih thu a sawi bawk.

Deputy Chief Minister chuan Khawzawl mipuite mamawhna leh rualawhna tipuitling tura Union Bank of India thawktute, a awmna tur hmunhma hawhtirtute leh hawn thuai a nih theih nana bawhzuitute fakawm a tih thu sawiin, Union Bank of India chu bank kalphung felfai tak nei a nih avangin a rintlak thu leh inbumna lam a awm a rinawm loh thu a sawi a. Mipui, sumdawng, NGO, Kohhran leh Department lamte'n an chhawr tangkai ngei a beisei thu a sawi a. Sawrkar Department scheme pawimawh tak Bank nena kalkawp ngai angte pawh tha taka tih dun theih a beisei thu a sawi a. Bank hnathawkte chu mirethei zawkte leh anmahni mamawha pantute inhawng taka lo dawngsawng thin tur leh, hamthatna awmte leh tul dangte tha taka hrilhhre zel thin turin a fuih bawk.

Thusawitu dang District Bawrhsap Pu K.Lalrohlua chuan Khawzawl District tana Bank la hmelhriat ngai loh Bank thar tha tak Union Bank of India (UBI) Khawzawla hawnfel a ni ta chu District tana hmasawnna rahbi chhinchhiah tlak tak a nih thu a sawi a. Tuichang AC bialtu MLA Deputy CM ni bawk Pu Tawnluia hmalakna a taka puitlin a ni ta chu lawmawm a tih thu sawiin, kum 1919 a Public Sector Bank ni tura din, 83.49% share capital sawrkarin a neihna Union Bank of India chu India rama Bank tha berte zinga mi a nih thu a tarlang a. District mipui, NGO, khawtlang leh Sawrkar Department-te chu Bank thar chhawr tangkaitu nih tum tura chahin, mipuite chu bank dawr hreh lo tur leh hamthatna awmte ngaihvena chhawr tangkaitu nih tum turin a chah a ni.

Union Bank of India (UBI) hawnna hun hi Pu Francis Lalruattluanga'n kaihruaiin Pastor David Saithuama Pachuau-in hunserh a hmang a. Building neitu Pu R.Vanlalruaia hnen atangin thusawi ngaihthlak a ni a. Branch Manager Pu Richard Lalrinchhana'n lawmthu sawiin hun hman a khar a ni.