1065/2023-2024

Dated the 7th July, 2023: Vawiin khan Serchhip DC Meeting Hall ah District Convergence Meeting leh District Nutritional Committee te chu an chairman Pi Nazuk Kumar, IAS, Serchhip bawrhsap hovin an thukhawm a. District chhunga ICDS Project hmalakna hrang hrangte an thlir a, hmalak zel dan tur an sawi ho.

Vawiina meeting hian district chhunga Anganwadi Centre, Nutri Garden la nei loten an neih ve theih dan turte, Tui Connection la nei lo Anganwadi Centre ten Connection an neih theih dan turte, Toilet hlui tawh lutuk hman hleihtheih tawh loh hrang hrang thuamthat dan tur te, LPG Connection la nei ve lo te ngaihtuah sak dan turte an sawi ho a ni. Heng bakah hian Anganwadi Centre diltu Serchhip Saron Veng VC dilna chu Director hnena thlen ni se an ti a, a building thar mamawh thu thlentu Serchhip Field Veng VC leh Kanghmun South VC ten an dilna pawh sawi ho a ni. Serchhip district chhungah hian Anganwadi Centre 160 a awm mek a, an zinga centre 50 te hian tui connection an la nei lo a ni. Hengte bakah hian ICDS Project hnuaia hmalakna dangte pawh an en ho a ni.

Tun dinhmuna Poshan Tracker in report a tarlan danin Serchhip district ah hian Supplementary Nutrition Programme hnuaia Nutrition dawng mek raipuar 517, hnute pe lai nu 383, nausen thlaruk hnuai lam 382 leh thla ruk leh kum thum inkar naupang 2643; kum thum atanga kum ruk inkar naupang 3184 an awm mek a. An vaiin Supplementary Nutrition Programme hnuaia Nutrition dawng lai zawng zawng hi 7115 an ni. June thlaa Poshan Tracker data tarlan dan vekin kum ruk leh a hnuai lam Severe Acute Malnutrition (chaw tha mamawh lutuk) tanpuina dawng lai naupang 33 leh Moderate Degree Malnutrition (chaw tha mamawh belh) tanpuina dawng 88 an awm a. Moderate underweight (naupang zang mah mah) naupang 180, severe underweight (naupang zang leh lutuk) 25, naupang rit leh lutuk (over weight) 139, thau uchuak (obese/very fat) 73, thanthu zual/thang thei lo tak (severely stunted) 227, leh thang tha tawk lo (moderately stunted) 482 an awm mek a ni. Poshan Tracker hi thawktuten nitina an dahluh thar (daily update) zel te, thlabia an dah luh thar (monthly update) zel te a awm avangin a danglam ve reng thin a ni.

Pi Nazuk Kumar hian thawktute chu naupang Severe Acute Malnutrition hnuaia enkawl lai 33 te chu thla thum chhunga Moderate level a awm chhohtir ngei tum turin a ngen a, chutiang naupang nu leh paten an fate eitur tha leh damdawi leina an lo nei zo chiah lo a nih pawhin khawtlang hruaitute, kohhran leh tlawmngaipawlte pawhin chutiang naupang te chu tanpui an inhuam a rin thu a sawi a, anni hote nena tan lo la thiam turin a chah a ni.