980/2023-2024

Khawzawl, the 29th June, 2023: Vawiin tlai dar 4:00 khan Pu Tawnluia, Dy. Chief Minister chuan Tualte Tomato Processing Centre sak mek chu tlawhin hmalaknate a enfiah. Deputy Chief Minister hi Pu Lalfakzuala,  Addl. DC Khawzawl, Pu Lalnunpuia, DHO Khawzawl, Pu Liantluanga Chohte EE, PHED Khawzawl leh Official dangte'n an tawiawm a ni.

Pu Tawnluia chuan Tualte khuaah Tomato Ketchup siamna tur hmunhma leh khawl lian zawk bun thar a ni tur chu lawmawm a tih thu a sawi a. Chief Minister Pu Zoramthanga kaihhruai sawrkarin kuthnathawktute hmakhaw ngaia hetianga ruahmanna a siam thin chu lawmawm a tih thu sawiin, tomato chingtute chu uar zawka ching turin a chah a. Tomato Processing Centre sak hna thawktute chu tha taka thawk turin a chah bawk.

Tualte Tomato Processing Centre hi SEDP sum cheng nuai 50 senga sak tur a ni a. Tunah hian a hmunhma tur laih zawh tawh niin, a building ruangam thleng thawh zawh tawh a ni.