981/2023-2024

Aizawl, 30th June 2023: Remna ni vawi 38na lawmna kal zelah tukin khan Tourism Department buatsaihin ‘Peace Walk’ neih a ni a. He hun hi I&PR Minister Pu Lalruatkima leh Tourism Development Board Vice Chairman Pu TC Pachhunga ten an hmanpui. Kawngzawh hi Chanmari leh Sikulpuikawn atanga bultanin, Vanapa Hall kawtah an intawk khawm a ni.

Vanapa Hall kawta inkhawm tawi neihah thu sawiin Pu Lalruatkima chuan kalkhawmte chu Remna ni chibai a buk a. Remna thuthlung ziah hnuah Mizoramin harsatna leh buaina lian tham a tawk lo chu a lawmawm hle a ni a ti a, inunaunna leh thlamuanna boruak chu cham reng se a duh thu a sawi bawk. Kalkhawmte chu remna tel lo chuan hmasawnna a awm thei lo a ni tih hre reng a, remna vawn nun tum zel turin Minister hian a chah a ni.

Pu Lalruatkima chuan zirlaite chu mizo nihna leh ziarangte vawng nung zel turin a chah a. An nunphung ah mizo nun zemawi - huaisenna, tlawmngaihna leh rinawmna te lang zel se a duh thu sawiin, ram tana fahrin manhla ni theuh turin duhsakna a hlan a ni.

Tourism Development Board Vice Chairman Pu TC Pachhunga pawhin thu sawiin, remna thuthlung hlu tak ziah a nih hnuah Mizoram chu remna ram tia hriat a lo ni ta a ni, a ti a. Remna awm theih nan inphahhniam a tul thin thu sawiin; remna awm theihna tura tha thawhtu political party hrang hrang te, tlawmngai pawl leh kohhran te chu zahna chibai a buk a. Remna chuan kawng tinrengah Mizoram hmasawnna thlen zel se a duh thu a sawi bawk.

Inkhawm hi Tourism Joint Secretary Pu V. Lalengmawia chuan a kaihruai a. Tukin a peace walk neih ah hian College, High School leh Higher Secondary School hrang hrang atangin Yuva Tourism Club member mi 1400 vel zet an kalkhawm a. Peace Walk hi Mizoram district khawpui hrang hrang ah neih a ni bawk.