3372/2022-2023

Kolasib dated 26th January 2023: Tukin khan Kolasib Stadium, Project Vengah Republic Day 2023 lawmna hun hman a ni a. Pu John LT Sanga, Deputy Commissioner chuan hnam puanzar pawt pharhin zahna chibai a buk. Kolasiba Republic Day lawmna hunah hian Parade Contingent 15 ten sipai lam an entir a, District chhunga Sawrkar pisa hrang hranga thawktute, tlawmngai pawl leh kohhran hruaitute leh Kolasib mipui thahnemtak an tel a ni.

Pu John LT Sanga, Deputy Commissioner chuan India sawrkar mahnia inrelbawl thei tura ‘India Constitution’ a taka hman tanna chuan India khua leh tui te tan kawng hrang hrangah zalenna te, duhthlanna chanvo leh intluktlanna te a ken tel avangin Rebuplic Day chu ni pawimawh tak a nih thu a sawi a. Mipui hamthatna tur leh ram hmasawnna tura uluk taka India Danpui lo duangtute inpekna chungah zahna lantir leh, khua leh tui tha ni tur a he Danpui chhunga mipuite tih ve tura duan te chu ngaih pawimawh a tul thu a sawi.

Republic Day lawmnaah hian Pu John LT Sanga, Deputy Commissioner chuan Kolasib district chhunga Department hrang hrang kaltlanga Sawrkarin kum 2022-23 chhunga hmasawnna hna a thawhte tarlanna hun a hmang a. Khum 100 awm theihna tur District Hospital thar sak hna kalpui a nih thu te, hmun 7 laiah Community Health Centre, Primary Health Centre leh Sub-Centre sak hna kalpui mek bakah Fast Track Court Building leh Judicial Quarters sak mek a nih thu te a tarlang a. Police department hmalaknain dan lova kuhva ro phur luh bag 945 man a nih thu leh thil ruk cheng nuai 42 man hu hmuh let a nih thu a sawi.

Ei leh bara mipui an intodelh theih nan Agriculture Department hnuaiah thlai chi thahnemtak sem a nih bakah kuthnathawktute tanpui nan Family Oriented SEDP kaltlangin chhungkaw 508 hnenah tanpuina sem chhuah a ni a. Fisheries Department hnuaiah Pradhan Mantri Matsya Sampada Yojana kaltlangin mi 150 thlanchhuah te tan sangha dilsak tanpuina pek turin ruahmanna a kal mek thu Pu John LT Sanga chuan sawiin Horticulture department leh Dragon Fruits Growers Society tangkawpin Tripura, Assam leh Meghalaya-ahte Dragon fruits thawn chhuah a nih thu a sawi.

Thingtlang leh khawpui chhunga cheng mi harsa zualte khawsak dinhmun siamthat nan DRDO kaltlangin MGNREGS hnuai a inziaklut mi 20899-te hnenah ni 80 inhlawhna siam sak tawh an nih thu leh khawtlang tana rotling hmunhma siam tur 10649 ruahman zinga 10433 chu thawh zawh tawh a nih thu tarlan a ni a. Housing for All kaltlangin Khawpui chhunga chhungkaw harsa zual 451 hnenah in sak tanpuina pek a nih thu Deputy Commissioner chuan a sawi bawk a ni.

PWD hmalakna hnuaia inkalpawhna tha a awm theih nana kawng thawmthat hna leh ramri depa Agriculture linked road sial hna thawh a nih dan te, PHE hnuaia kum 2022 chhunga in 8657 ah tui herh haw theiha thlunzawm a nih thu te Deputy Commissioner chuan tarlangin loneituten an hnathawhna hmunah eng an chhit ve theih nan Zau hrang hrangah P&E hmalaknain kawlphetha thlunzawn hna thawh a nih thu a sawi.

Deputy Commissioner chuan Kolasib chu district nuam leh entawntlak a nih theih nan dan leh thupek ngaih pawimawhna te, ruihtheih thila fihlim turte in kalkhawmte a chah a, lirthei vanga khawpui tawt kan siam loh nan lirthei lei tum te chuan a hunna tur hmunhma ngaihtuah hmasak thin a pawimawh thu a sawi. Pu John LT Sanga chuan kalkhawmte chu Republic Day chibai bukin Deputy Commissioner pisa chu Kolasib district mipuite tana thawk tur a ruat a nih angin a tul apiangah tupawh tlangnel taka lenglut thin turin a sawm bawk a ni.

Vawiin Republic Day Parade neihah hian DIET, Kolasib chuan Unarmed Contingent zingah lawmman pakhatna an la a, CZ Higher Secondary School chuan School Contingent zingah lawmman pakhatna an la bawk a ni.