3373/2022-2023

Dated Serchhip, the 26th January, 2023: Vawiin khan ram chhung hmun dangte rualin Serchhipah pawh India Republic Day vawi 74 na chu ropui taka hman a ni a, a lawmna pui ber Serchhip Sports Stadium a buatsaihah Pi Nazuk Kumar, IAS, Serchhip Bawrhsap chu khuallian a ni.

Zing Ni chhuah rualin sawrkar pisa hrang hrangah Hnam Puanzar zar a ni a, dar 7:00 AM ah he ni pual hian District Hospital, Mercy Hospital, Unity Orphanage Home, Shalom Special School, Zoar Deprived Children Home, Old Age Home, Adult Rehabilitation Centre leh District Jail-ah te thilpek hlan an ni.

Zing dar 9:00 ah a lawmna pui ber hi Serchhip Sports Stadium ah hmanzui a ni a, he hunah hian khuallian Pi Nazuk Kumar, IAS chuan Hnam puanzar pawt pharhin, parade contingent 13 te chibai bukna a chhanglet a, thusawina hun a hmang bawk. Khuallian chuan, India ramin zalenna hmu a, a chhunga cheng mipuiten kan duan ngei ram Danpui (Constitution) kan nei hi a ropui em em a. Danpui tha tak zarah kan ram chu kum rei lote chhunga khawvela ram thil tithei leh ropui berte zinga miah kan inhlangkai a ni. Mizoram pawhin hmasawnna a hmu nasa em em a, kan district ngei pawh Mizoram chhunga hmasawnna hmu nasa berte zinga mi kan ni awm e, tiin tunhnaia hmasawnna tlangpui Serchhip district in a hmuhte a tarlang a ni. Mipuiten nun ralmuang kan neih theih nan Police Department ten tan an la nasa hle a, kum 2022 chhung khan case 161 register-in case 137 chu an charge sheet a, an zinga case 17 hi ND&PS Act hnuaia mi an ni, Excise & Narcotic Department lamin ND & PS Act hnuaiah hian Case 70 lai an register bawk. December ni 15 khan E. Lungdar Police Beat Post thar chu Home Minister zahawm tak Pu Lalchamliana'n a hawng bawk. Job Card hi 15961 Serchhip district ah awmin sawrkar kum kal mekah ni 67 inhlawhna buatsaih tawh a ni. PMAY Grameen, AwaasPlus tia sawi chu kalpui tharin, hemi hmang hian mirethei chenna in 426 sakna tur Ministry of Rural Development in phalna an rawn pe tawh a, chhungkaw 266 te tan a thawhkhatna sum an rawn pe chhuak tawh nghe nghe a ni. SEDP Family Oriented Programme hnuaiah chhungkaw tam tak tanpuina thawhkhatna pek tawh an ni a, hmalak zui zelna tur pawh a lo thlen thuai beisei a ni. Rashtriya Gram Swaraj Abhiyan hmangin VC house thar pakua leh a dang sawmpakhat thuamtharna hnathawh a ni a, Tuichang lei thar chu hawn theiha peih thawkhat ni tawhin kum kal mek chhungin PMGSY hnuaia khaw karkawng pathum thawh zawh a ni a, pakhat thawk mek a la awm a, NABARD sum hmanga Keitum leh N. Vanlaiphai inkar kawng siamthat hna leh NEDP sum hmanga N. Vanlaiphai leh Chawngtui inkar kawng chu thawhzawh a lo ni tawh bawk. Heng te bakah hian Khuallian hian hmasawnna hnathawh dang engemawzat a tarlang bawk.

Khuallian hian Parade Contingent tithate hnenah lawmman hlanna a nei nghal a, lawmman dawngtute chu; pakhatna All Saints School, pahnihna Goodwill English Academy leh pathumna Marian High School te an ni a, an Overall Commander hi SI Melody Lalmuanpuii, Serchhip DEF a ni. Heng bakah hian kum kal meka fai inelna hrang hrang leh Republic Day puala buatsaih Volleyball Running Trophy lawmman te khuallian hian a sem nghal bawk.

Republic Day lawmnaah hian Little Flower Convent School leh Sub Headquarters YMA Cultural Troupe ten Hnam lam entirna an nei bawk a ni.

A lawmna pui ber neih zawh hian Khawtetlanga Bawrhsap Bungalow ah sawm bikte pualin 'At Home Tea Party' buatsaih zui a ni.