3374/2022-2023

Pawlkut thla ni 26, 2023: Vawiin khan India Republic Day vawi 74-na chu Lawngtlaia Central YLA khelmualah ropui taka lawm a ni a. Lawngtlai Bawrhsap Pu Amol Srivastava, IAS chu Khuallian a ni.

Zing ni chhuah rualin sawrkar pisa leh hmun pawimawh dangah te India Ram Puanzar zar a ni a. Zing dar 8:00-ah CYLA khelmualah Khuallianin Ram Puanzar pawt pharhin, Ram Puanzar chibai buktu parade contingent 23 te chibai buk a chhang let a, Republic Day thuchah a sawi nghal a ni.

Khuallian Pu Amol Srivastava chuan Lawngtlai District mipuite chu Republic Day chibai bukin, Republic Day chu India ram Danpui hman ṭan ni a nih thu leh Danpui chu sawrkar inrelbawl dan hriltu ber a nih avanga a hlutzia a sawi a. Republic Day huaihawttute, parade contingent-te leh mipui kal khawmte chu hun hman tihlawhtlingtu an nih thu sawiin, lawm thu a hrilh a. Kum kal ta chhunga Lawngtlai District-a sawrkar department-te hmalakna tlangpui tar langin, an hnathawh chhuanawm a tih thu a sawi a. District Administration leh District Council-te'n thawh hona ṭha tak an neih thu sawiin, chu vang chuan District-in kawng hrang hrangah chak zawkin hma a sawn theih phah a ni, a ti.

Khuallian chuan hun kal tawh leh vawiin thlenga tlawmngai pawl, media leh mipuite’n sawrkar department-te an thawhpuinaah lawm thu sawiin, District hmasawn nana thawhpui zel turin a sawm a. Police, Excise leh Central YLA Drugs Reduction Squad (DRS) te'n ruihhlo dona kawnga an hma lakna fakin, ṭhalaite venhim kawngah an thawhhlawk tak zet tih a sawi a. Faina kawnga UD&PA Department leh LADC Sanitation Department te ṭhahnem ngaihna leh VC, NGO, kohhran, media leh mipuite thawhpuina ṭha tak chu lawmawm a tih thu sawiin, a rah senga Lawngtlai District-in Mizoram khawpuite zinga faina kawnga hmasawn chak ber lawmman, "Fastest Mover Award" a dawng chu lawmna belhchhahtu a nih thu a sawi bawk.

Republic Day lawmna ceremonial parade-ah hian armed contingent 1, unarmed contingent 4 leh school contingent 18 awmin, Khuallianin thu a sawi zawh hian lawmman sem nghal a ni a. NCC Don Bosco School chu pakhatna niin, pahnihna Government Region Higher Secondary School Girls leh pathumna Harvard English School te an ni a. Mizoram Police armed contingent leh parade contingent dang 19 chu participation prize hlan ni bawkin, parade commander SI (AB) K. Lallianuka leh khuang vawtute leh judge-te pawh lawmman siamsak an ni bawk.

Ceremonial parade lawmman bakah hian Republic Day pual hian a hnuaia mi ang hian chawimawina leh lawmman hrang hrang sem a ni bawk a. Khuallian Pu Amol Srivastava bakah, faina lama lawmmante chu LADC-a Executive Member i/c Sanitation Pu Lalropuia Chinzah leh infiamna lama lawmmante chu LADC-a Executive Member i/c Sports & Youth Services Pu C. Hrangṭhianga te'n a dawngtute kutah an hlan hlawm a ni.

1. Drugs Reduction Squad (DRS), Central Young Lai Association:

Lawngtlai District-a ruihhlo dona kawnga an thawh ṭhat avanga chawimawina hlan an ni a. September 2, 2022-a din niin, September 14, 2022 aṭangin hma an la ṭan a. Drugs, ganja leh zu nuai eng emaw zat an man tawh a. A zuartute chu Police leh Excise lam-ah thlenin, case siamsak ṭhin an ni a; a titu an mante chu Lairam Rescue Centre leh TNT-ah te dah lutin, an sim theihna turin hma an la ṭhin a ni.

2. UD&PA Department hnuaia Fai Intihsiakna:

1) Veng fai ber:
Pakhatna - AOC Veng, Lawngtlai
Pahnihna - Bethel Veng, Lawngtlai
Pathumna - Chandmary, Lawngtlai
2) Sawrkar zirna in fai ber: Govt Bazar Middle School
3) Institution fai ber: ANM School, Lawngtlai
4) Sawrkar pisa fai ber: Executive Engineer office, P&E Lawngtlai Power Division
5) Damdawi in fai ber: District Hospital, Lawngtlai
6) Hotel fai ber: Sugar & Spice - Dingdi, Bazar, Lawngtlai
7) Restaurant fai ber: MB Restaurant, Chandmary, Lawngtlai
8) Appreciation citation:
(i) V. Lalngaihthangi, AOC Veng - Local Ambassador, SBM (U)
(ii) NSS Govt Lawngtlai College
(iii) NSS Govt Region Higher Secondary School
(iv) Downtown English School Eco Club

3. Republic Day, 2023 3rd Inter-Club Badminton Tournament champion: Lawngtlai Chandmary Badminton Club

4. Republic Day Volleyball Running Trophy winner: H. Rinmawia Memorial Volleyball Club, Lawngtlai Vengpui

He'ng bakah hian Assam Rifles aṭangin mi 6 hnenah wheelchair hlan a ni bawk.

Vawiina Lawngtlaia Republic Day lawmnaah hian Lai Autonomous District Council-a Chief Executive Member charge latu Pu Lallawmsanga Apetow, Chairman Pu VL Hmuaka, LADC-a member-te leh Lawngtlai Superintendent of Police Pu Rakesh Paweriya, IPS te bakah, state leh LADC official-te, ex-servicemen-te, political party leh tlawmngai pawl ai awhte, chanchinbu mite, lawmman dawngtute, zirlai leh mipui ṭhahnem tak an tel a. Muala hun hman zawh hian, chhun lamah Lawngtlai Bawrhsap Bangla, Chawnhu-ah 'VIP At Home' hun hlimawm tak hman chhunzawm a ni.

Kumin Republic Day pual hian Lawngtlai District Republic Day Celebration Committee chuan District Hospital Lawngtlai, Christian Hospital Lawngtlai, Lairam Christian Medical Centre & Hospital, Lairam Motherless Home, District Jail, Lairam Rescue Centre leh Gilead Drop-In Centre-ah te ṭanpuina ₹ 2,000/- ṭheuh an hlan bawk a ni.