3252/2024-2025

Khawzawl, dated 28th November 2024: Vawiin chawhma dar 11:30 a.m khan KVK Khawzawl Conference Hall-ah Krishi Swarna Samridhi Week (KVK Golden Jubilee) lawmna hun hman a ni a, Deputy Govt. Chief Whip leh 22-Tuichang A/C bialtu MLA ni bawk, Pu W. Chhuanawma'n khuallian niin a hmanpui.

Khuallian Pu W. Chhuanawma chuan Tuichang bial chhunga kuthnathawkte taima a tih hle thu sawiin an thawh hahna a fak a, KVK te'n thlai chin dan chungchanga an tanpuina leh an zirtirna hi ropui a tih hle thu a sawi bawk. Kuthnathawh hi hna zahawm leh ngaihsanawm taka a ngaih thu a sawi a, mi zahawm tak tak hmaa thu a sawi thei hi lawmawm a tih thu a sawi bawk. Thawhrimna atang chauhin hlawhtlinna a awm tih sawiin malsawmna dawng zel turin theih tawp chhuah thawk zel turin kuthnathawkte a fuih bawk a ni. Hemi zawh hian khuallian Pu W. Chhuanawma hian kuthnathawkte hnenah KVK atangin thlai chi hrang hrang a sem nghal bawk a ni.

He hun hi Dr. Malsawmkimi, Senior Scientist & Head, KVK Champhai District, Khawzawl chuan chairman niin a kaihruai a, KVK thiltum te, hnathawh hrang hrang te, lawmman leh ngaihhlutna an dawn tawh te leh Khawzawl district chhunga thlai leh thei an buaipui te PowerPoint presentation hmangin a sawi lang bawk. Thusawi Pu Lawmkima, Lead District Manager, Champhai District hnen atangin ngaihthlak a ni a bawk a, loan pek theih leh pek dan te, bank mawhphurhna hrang hrang kuthnathawkte'n an tangkai pui theih tur te a sawi lang a ni.

Tawitawzawl Zau Potato Growers Association, Khawhai atangin alu an thar chhuah dan leh an dinhmun chungchang report ngaihthlak a ni bawk a, zai ngaihthlak a ni bawk a ni. Pi R. Vanlalduati, Subject Matter Specialist (Soil Science) chuan lawm thu sawina hun a hmang bawk a ni.

He hunah hian Pu C. Vaninmawia, SDPO a lo tel a, khaw hrang hrang atangin kuthnathawk te an lo tel bawk a ni.