3253/2024-2025

Aizawl, the 28th November, 2024: Vawiin khan Veterinary Hospital leh Clinics Licence Inspection Team-te chuan Bualpui leh Kolasib-a Private Hospitals leh Clinic-te licence dilna chu a hmunah kalin an enfiah.

The Mizoram Licencing & Regulation of Private Veterinary Hospitals & Clinics Act 2021 (No 3 of 2021) in a sawi angin Inspection Team-te chuan Mizoram hmun hrang hrang atanga licence dilnate a hmunah kalin an enfiah a. Inspection Team hi Dr. Lalremliana, President, Mizoram State Veterinary Council (MSVC) in hoin Member Dr. F. Lalramhluna, Addl. Director, AH & Vety. Department; Mizoram State Veterinary Association (MSVA) aiawh Dr. TC Lalthanzauva, Nodal Officer Dr. Thangzadinga leh Indian Veterinary Association (IVA) aiawh Dr. Lalfamkima te an tel a ni.

Heng licence dilna an enfiahna atangte hian licence pek tlakte pek chhuah an ni dawn a. Mizoram puma licence dil hi Aizawl District-ah 10, Lunglei District-ah 4, Siaha District-ah 2 leh Kolasib District-ah 3 te a awm a. Danin a sawi angin Veterinary Hospital leh Clinics hawng tur chuan Veterinary Doctor, Mizoram State Veterinary Council-a in register-te chauhin an enkawl tur a ni a; an hmanrua leh damdawite pawh danin a phal ang chin a ni ngei tur a ni. Dan awmsa zawm famkim lote chu licence pek chhuah an ni lo ang.

Inspection neih rual hian one day sensitization workshop on 'The Mizoram Licencing and Regulation of Private Veterinary Hospital & Clinic Act 2021' leh 'Standard of professional Conduct, Etiquette & Code of Ethics for Veterinary Practitioners Regulations 1992' neih nghal zel a ni a. Dr. Thangzadinga, Deputy Dircetor (LH) chu resource person niin, Vety. Doctor-te chu ran enkawl kawngah thahnemngai taka thawk tur leh an zir thiamnate dik taka hmang tura zirtir an ni.

Workshop-ah hian District tina private practitioner-te an tel kim hle a. Private Hospital & Clinics Inspection leh Workshop hi November ni 12, 2024 khan MSVC Hall, Aizawlah neih niin, November ni 20 khan DVO Conference Hall, Lunglei leh November ni 21 khan DVO Office, Siaha ahte neih a lo ni tawh bawk.