3529/2024-2025

Dated Kolasib the 13th December 2024: Vawiin tlai Khan Kolasib DC kawt tual zawlah Mizoram Inter Village Football Championship 2024 a Champion Team, Kolasib Joint VC teamte hmuahna neih a ni a. He hun hi Pu Lalfamkima , Deputy Speaker Mizoram Legislative Assembly in a hmanpui a ni.

Pu Lalfamkima chuan tun hma chuan kolasib chu football ah an hmingtha thin a, amaherawhchu hun rei tak chhung Mizoram level ah an lan tawh loh hnuin kum sawmhnih dawn hnuah hetianga Tournament lian tham a an Champion thei chu a lawmawm takzet a ni,  a ti. Tun Tournament a Kolasib  aiawh player ten hlawh hranpa pawh phut lova an kal chu an chuanawm hle a ni, a ti a . Thil engkimah hlawhtling tur chuan inpekna a pawimawh a, tuna an hlawhtlinna chuan thalai te entawn tur a hnutchhiah a ni tih sawiin, theihtawp an chhuah chhunzawm zel chuan Kolasib District chu Mizoram ah hmahruaitu an la nih ngei a beisei thu a sawi.

Pu Robert C Lalhmangaiha, Kolasib DC pawhin lawmthu sawina hun hmangin Player hlawhtlinna chang te chu Kolasib District chuan an chhuang takzet a ni, a ti a. An hma hun kal zel turah taihmakna leh mahni inthununna nen theihtawp chhuah a hlawhtlinna chang zel turin a duhsakna a hlan nghal bawk.

Mizoram Inter Village Football Championship 2024 a Champion Team Kolasib Joint VC team te hian lawmman ah Trophy leh pawisa fai cheng nuai 2 leh Sial an dawnga. Fair Play award pawh dawngin, hei hian pawisa fai cheng 50000 a keng tel a ni.

Vawiin a Joint VC Team te hmuahna ahhian Kolasib Jt VC, NGO aiawhte,Kolasib a Sawrkar hnathawk thenkhat leh mipui thahnem tak an tel a ni.