3638/2024-2025

Dated Kolasib the 20th December 2024 : Vawiin tlai dar 3:00 khan Kolasib Hmarveng Indoor Stadium-ah GIG Motors Mizoram Inter-Village Football Championship 2024 a Champion Team - Kolasib Joint VC Team-te’n Tournament-a an chak lawmna hun neih a ni a. He hun hi Pu Lalfamkima, Deputy Speaker Mizoram Legislative Assembly leh Kolasib Bialtu MLA ni bawk chuan khuallian niin a hmanpui a ni.

Deputy Speaker Pu Lalfamkima chuan, Kolasib Joint VC Football Team-te’n Mizoram Inter-Village Football Tournament-a hlawhtlinna an chan chu a ropui tiin, a lawmpui thu he hunah hian a sawi a. Infiamna kawnga midangte entawntlak ni zel turin Champion Team-te chu fuihna thu a chah bawk. Deputy Speaker chuan vawiin a an hlawhtlinna chu rahbi thar pakhat a ni tih hriaa kawng thui tak zawh tur an la nei a ni tih hria a, inthladah lo a nasa zawk a tang zel turin a chah a. Pu Lalfamkima chuan Infiammi ni turin Insumtheihna a pawimawh thu he hunah hian a sawi a. Ram leh hnam suattu 'Ruihhlo' chu mihringte kan nih tur ang min nih phak loh tirtu leh hmasawnna kawng ti thuanawptu lian tak a nih thu sawiin Sawrkarin ruihhlo do kawnga a hmalakna chu mitin thlawp turin a chah nghal bawk a ni.

He hunah hian Kolasib DC Pu Robert C. Lalhmangaiha pawhin thusawina hun a hmanga. Kolasib Joint VC Team-ten, Mizoram pum huapa Football intihsiakna ah, Team tam tak zinga Champion no mawi hawn thei an ni chu Kolasib khua tan hun chhinchhiah tlak tak a ni thu sawiin a lawmpuina thu a sawi a. He an hlawhtlinna leh chakna ah hian Kolasib District-in Football Discipline mai bakah Sports Discipline kawng hrang hrangah hma a sawnna harbi a ni zel theih nan leh thalaite leh infiam mite chona thar petu a nih ngei a beisei thu kalkhawmte hmaah a sawi a ni.

GIG Motors All Mizoram Inter-Village Football Championship 2024, December ni 12 a RG Stadium, Mualpuia Final inkhelah Kolasib Joint VC te hian hnehna an chang a. Kolasib Jt. VC hian Rs. 2,00,000 bakah sial leh trophy an dawnga. Fairplay lawmman cheng 50,000 leh trophy an dawn bakah Kolasib Joint VC Team Member atang vekin Paul Ramfangzauva hnenah best player lawmman Rs. 10,000 an dawng bawk a ni.

Vawiin a Kolasib Joint VC-te’n Inter-Village Football Tournament-a an chak lawmna ah hian Joint VC Member bakah Sawrkar Officials-te thahnem tak an tel thei a. Tlai lama Tournament a lawmman Sial talh in ruai buatsaih a ni bawk.