3011/2024-2025

Dated Kolasib, the 14th November 2024: Vawiin khan I&PR Conference Hall Kolasibah ‘71st All India Cooperative Week’ Celebration hman a ni a. Pu Lalfamkima, Deputy Speaker, Mizoram Legislative Assembly chuan he hun hi khuallian niin a hmanpui.

He hun hi Pu Lalthlamuana District Cooperative Officer(DCO) chuan a kaihhruai a. 71st ALL India Cooperative Week Celebration hmanga kalkhawmte chu inlawmna thu sawiin Kolasiba Cooperative Office hmalakte tarlanna hun a hmang.

Khuallian Pu Lalfamkima, Deputy Speaker chuan he hunah hian thusawina hun hmangin, ‘Cooperative Week Celebration’ hman a ni thei chu lawmawm a tih thu a sawi a.  Cooperative 'thawhhona' tih chu thumal pawimawh tak a ni a, mihring nun hona kawng engkima hlawhtlinna leh rahtha chuak tur chuan thawhhona a pawimawh takzet a ni tih hrethar turin he huna kalkhawmte fuih.

Pu Lalfamkima chuan Cooperative tha awm tur chuan taimakna leh thawhrimna a pawimawh thu a sawiin kawng engkimah Society anga mipuite kan intel khawm hian kan chak in mi chak lo zawkte pawn midangte rualin ke an pe theih thu a sawi a. Mizoramah ngei pawh ei zawnna kawng hrang hrangah Cooperative Society tam tak din a lo ni tawh thin a, mahse Society tamtak chu a zuih ral leh mai thin a, society chak tha tak din a kal zel thei tur chuan Society chhunga awmte’n tanrualna tha an mamawh a, chumi tur chuan mimal tinte’n mahni tan chauh hlawkna um lovin midangte nena an hlawktlan pui theih tur ngaihtuah a, taimakna nun nen a kal a pawimawh thu a sawi a ni.

‘All India Cooperative Week’ hi kum tin November ni 14 atanga ni 20 chhung hian National Cooperative Union of India (NCUI) bultumin India ram zalenna sualtu Pandit Jawaharlal Nehru a piancham hriatreng nan neih a ni thin a. Kumin pawh hian Role of Cooperative in Building ‘Viksit Bharat’ tih thupui hmang in Cooperative Week hman a ni.

He hunah hian Pu H. Lalmuanpuia, Secretary Khawnpui Consumers’ Society hnen atangin Cooperative Week thupui 'Role of Cooperative in Building Vikshit Bharat' tih chu sawi zuana a nei a. ‘Role of Cooperative in Building Vikshit Bharat’ tih chu India Sawrkar laipuiin India ram Developed Country-a a hlankaina kawnga mipuite tanrualna leh thawho pawimawh zia a nih thu a sawi.

Kolasiba Cooperative Week Celebration hmanna ah hian Kolasib District chhunga Cooperative Society hrang hrang thahnem tak an tel a. Pu B. Lalremliana, BOB MCAB Ltd. Chairman Kolasib Multipurpose C/S Ltd. chuan lawmthu sawiin he hun hi a khar a ni.