3012/2024-2025

2024 Sahmulphah thla ni 14: November ni 16, 2024 zan thleng awh tur Leitlangpui Music Festival chu vawiin chawhma khan Kawmzawl, Pukpui, Lungleiah ṭan niin, Mizoram Sawrkara Tourism Minister Pi Lalrinpuii'n a hawng.

Leitlangpui Music Festival hawnna inkhawmah hian Tourism Minister Pi Lalrinpuii chuan tun hma lama Mizorama Tourism Department bul tuma kut (festival) hrang hrang huaihawt ṭhinah mipuite'n ta neihna rilru kan pu pha lo ṭhin nia a hriat thu sawiin, hemi hi tidanglam turin Tourism Department-in festival a huaihawt ṭhin chu ennawn a nih thu a sawi a. Mipuite'n an ta neih theih tur festival nei thei tur leh a huaihawt vel pawh sawrkar department-in buaipui tawh lo va, tender hmanga outsource ṭhin turin ruahmanna thar siam a nih thu sawiin, mipuite ta neih theih ngei tur festival dap a nih laiin “Serkawn Concert” hming lo ri chhuakin, Zosap Missionary Pu HW Carter-a, Mizote'n Zochhawni Pa tia kan kohvin kum 1930 chho vela mi dangte tiphur thar a, thu leh hla lama harh tharna a lo thlen chhoh dan leh kum 1932 favang awllen laia hlawhtling taka Serkawn Concert an lo huaihawt chhoh dan te hre thar lehin, Leitlangpui mipuite ta neih leh lung tilengtu “Serkawn Concert” chu kum 90 liam hnuah chawi vul thar leh turin hma lak a nih tak thu a sawi a. “Serkawn Concert” tih hming chuan a huam zim deuh avangin Mizoram pum huap, Mizoram zai mi leh hla phuahtute tana platform ṭha siamna tur, kan hnam nunphung leh tihdan ṭhate chawi vul chhunzawm zelna a nih theih beiseiin, “Leitlangpui Music Festival” tiin a hming chu phuah a nih thu a sawi.

Minister Pi Lalrinpuii chuan Leitlangpui Music Festival hlawhtlinna tur chu sawrkar emaw, a huaihawttute emaw ni lovin, khawtual mipuite an nih thu sawiin, khawtualin kan ngaihhlut loh chuan mi dangin ralkhat aṭangin min rawn ngaihhlutpui dawn lo, a ti a. Festival hlawhtlinna tur dang leh chu zai mite leh thu leh hla lama tui miteah a innghat bawk tiin, rimawi lama tui mite chu he kut hi hmang ṭangkai tur leh music festival awm leh hun tur nghakhlel taka mipui siam turin a sawm a. LMF chu thu leh hla lama harh tharna a lo thlen theihna ni se tih chu a duhthusam a nih thu sawiin, Mizoram mai bakah, India ram chhung leh khawvel huapa lar chhuak a, tourist tam zawk hipna a nih a, mipuiin hlawkna tam zawk an hmuh theih phahna a nih a beisei thu a sawi a. Tender hmanga outsource a nih angin Brighter Co. & BBY Animals Event Management Team te'n he event buatsaih hna hi an chang tih sawiin, he festival hlawhtlin nana theih tawp an chhuahnaah leh DC Lunglei Chairman-na hnuaia Organising Committee te ṭhahnem ngaihna leh thawh rimnaah lawm thu a sawi nghal bawk a ni.

Vawiin Leitlangpui Music Festival hawnnah hian Organising Secretary, Lunglei Municipal Council (LMC)-a Chief Executive Officer Pu Donny Lalruatsanga chuan inlawmna thu sawiin, Mizoram sawrkar hma lakna avang Leitlangpuia Rimawi Kutpui hman theih a ni tur chu lawmawm a tih thu leh department anga mawhphurhna nei leh hma laksaktute chungah lawm thu a sawi a. Mizote chu lungngaih hunah te, hlimna hunah te pawh thil danga inhnem lovin, rimawi leh zai te'n kan inawi ṭhin tiin, Leitlangpui Music Festival chu zai leh rimawi chawi nun leh ṭhalai talent nei ṭha tak takte leh zai mite chawi kan nan buatsaih a nih thu a sawi.

Leitlangpui Music Festival hawnnaah hian BCM General Secretary Rev. Dr R. Lalbiakliana'n hunserh hmangin, Tourism Director Pi R. Lalrodingi'n lawm thu a sawi a. Hnam lam chi hrang hrang, zaipawl, malzai leh special item ṭhahnem tak entir a ni bawk a. Chawhnu lamah concert-in chhunzawm a ni.

Leitlangpui Music Festival-ah hian festival chhimtute tan ei leh in leh souvenir zawrhna stall hrang hrang buatsaih a ni a. Naktuk, November ni 15 chhun dar 12:00-ah Band Contest awmin, tlai dar 3 aṭangin concert buatsaih a ni leh ang a. A tawp ni, November ni 16-ah tlai dar 2 aṭangin concert buatsaih a ni bawk ang.