3013/2024-2025

2024 Sahmulphah thla ni 14: Vawiin khan Directorate of Social Welfare & Tribal Affairs (MSD&RB), Deputy Commissioner Lunglei leh District SW&TA Officer Lunglei te ṭang ho huaihawtin Convention Centre, Lungleiah zirna in hrang hranga ruihhlo do kalpuina tur, Drug Awareness & Prevention under National Action Plan for Drug Demand Reduction (NAPDDR) hawnna hun hman a ni a. Social Welfare, Tribal Affairs, Women & Child Development Minister Pi Lalrinpuii chuan Khuallian niin hun a hmanpui.

Khuallian Pi Lalrinpuii chuan sawrkarin ruihhlo do chu tih takzeta kalpui a tum tih sawiin, kan ramah ruihhlo a lo rem theih nan  sawrkar chuan mut mawh hnar mawha lak a tum a, inzirtirna lam pawh ngawrh zawka kalpui zel tum a ni, a ti a. Kan rama ruihhlo ti kan nasat lutuk avanga a rah lang chu mipa aiin hmeichhia voter 28,000 velin kan tam zawk tawh a, a ngaihmawhawm hle a ni tiin, ruihhlo dona kawngah kohhran ang te, khawtlang ang te leh sawrkar ang tea kan ṭan ho a ngai a ni, a ti a. Ruihhlo hman sual chu a bikin ṭhalai zingah a hluar tih sawiin, ruihhlo ti mekte chhanchhuah bakah, a la ti ve lote venhim chu ngaih pawimawh hmasaka neih a ṭul a ni, a ti a. Ruihhlo do turin sum leh pai, tha leh zung, thiamna leh inpekna a ngai tiin, sawrkar hma lakna piah lamah tlawmngai pawl, khawtlang, kohhran leh mipui zawng zawngte ruihhlo dona kawnga theih tawp chhuah ṭheuh turin a sawm a ni.

Lunglei Deputy Commissioner Pu R. Lalṭhazuala chuan inlawmna thu sawiin, National Action Plan for Drug Demand Reduction, Ministry of Social Justice & Empowerment, Govt of India chuan ruihhlo do programme a siam a,  Mizoramah hma lak nan Lunglei leh Serchhip District te thlan a ni tih a tar lang a. Lunglei District-ah school 25 thlang chhuakin, he'ng school-ah te hian awareness kalpui  tum a ni a, school tin aṭangin zirtirtu pakhat ṭheuh training pek an ni tih a sawi a. Sawrkar laipui hmalaknaa Lunglei District thlan a ni ve chu lawmawm a tih thu sawiin, Mizorama ruihhlo do rem turin sawrkar hma lakna chauh a tawk zo lo va, khua leh tui zawng zawngte ṭan tlan a ngai a ni, a ti. 

He hunah hian UPC (NEI) Lunglei District Superintendent Rev. C. Lalrintluanga'n hunserh hmangin, Mizoram Social Defence & Rehabilitation Board (MSD&RB) aṭangin Pi Vanlalhruaii'n pawhin thu a sawi a. Kum 2022-a Mizorama ruihhlo chungchang survey neihah ruihhlo ti an tam thu leh kum naupang te te ruihhlo ti an awm tih hmuh chhuah a nih avangin ruihhlo do kawnga hma lakna tur project hrang hrang siamin, Ministry of Social Justice & Empowerment ah theh luh a nih thu a sawi a. Drug demand reduction atan Mizoram tan Ministry of  Social Justice & Empowerment-in sum leh pai zawng leh programme hrang hrang atan ṭanpuina leh hma lakna tur a rawn pe ṭhin a, chu chu Social Welfare Department chuan ṭangkai takin a hmang ṭhin tih sawiin, tuna school-te tana ruihhlo dona kalpui turah hian Lunglei District-a school 25-a zirtirtu pakhat ṭheuh thlang chhuaka training pek an nih thu leh anni'n zirlaite hnenah kawng hrang hrangin an tlangaupui leh dawn tih a sawi a. An hma lakna atan ₹ 10,000/- ṭheuh pek an ni tih a sawi.

Ruihhlo dona tura Lunglei District-a school 25-te hnena cheng sing khat ṭheuh pek tur hi Minister Pi Lalrinpuii chuan zirtirtute hnenah a hlan a. Sikul thlan chhuahte hi higher secondary school 2, high school 9 leh middle school 14 an ni.

Vawiin hun hmanah hian sawrkar official-te, school thlan bik zirtirtute, tlawmngai pawl ai awhte, kohhran hruaitute, Grace Society, WADA leh zirlai naupangte an tel a. Pi Vanlalhruaii, MSD&RB, SW&TA leh Pu Lalrindika, MSD&RB, SW&TA te'n ruihhlo do chungchanga thil pawimawh hrang hrang an zirtir bawk a ni.