3014/2024-2025

2024 Sahmulphah thla ni 14: Vawiin chawhma dar 11:00 khan Bethel Centre Children's Home, Chhumliamkawn, Lungleiah District Hub for Empowerment of Women (DHEW), DPO (WCD) Office leh District Child Protection Unit (DCPU), Lunglei buatsaihin Naupangte Ni (Children's Day) 2024 lawmna hun hman a ni.

He hun hi Lunglei District Programme Officer (Women & Child Development) Pu C. Lalnunfela chuan kaihruaiin, Lunglei Additional Deputy Commissioner Pi Rochuangkimi Khenglawt chuan Khuallian niin a hmanpui a. Lunglei District chhunga naupang enkawlna home hrang hranga thawktute leh naupangte an tel.

Khuallian Pi Rochuangkimi Khenglawt chuan India ramah Naupangte Ni chu naupangte ngainatu leh dah pawimawhtu, India Prime Minister hmasa ber, Pu Jawaharlal Nehru piancham hriat reng nan leh chawimawi nana hman a nih thu a sawi a. Women & Child Development Department te'n naupangte tana an hma lakna chu fakawm a tih thu sawiin, kan vela naupangte an him leh him loh te, enkawl leh ṭanpui ngai an awm leh awm loh te ngaihven chu khua leh tui zawng zawng mawhphurhna a ni, a ti a. Naupang enkawlnaa thawktute chu rawngbawlna pawimawh tak chelhtu an ni tih hria a, ṭhahnem ngai taka thawk zel tura chahin, Naupangte Ni chu hlim taka hmang turin kal khawmte duhsakna a hlan bawk.

Pi Malsawmzuali Zadeng, Coordinator chuan naupangte hriat thiam theih turin taksa khawih dan him leh him lo te a sawi fiah a. Home-a lo amw tawh ṭhin, Pu Zonunsanga chuan a hun tawnte leh home-a a awm laia harsatna hrang hrang a hmachhawn dan te leh a tal chhuah dan te a sawi bawk.

He hunah hian Bethel Centre, KK Home, BCO & BCRC leh Special Home naupangte aṭangin zai leh lam te ngaihthlak leh thlir ho a ni a. Lunglei District Child Protection Officer Pi Lalrinkimi Hmar chuan lawm thu a sawi a. Hemi hnu hian naupangte tan Bethel Centre tual zawlah intihhlimna hun buatsaih zui a ni.

Vawiin Naupangte Ni pual hian DPO Pu C. Lalnunfela leh Bethel Centre-a thawktute chuan thing an phun bawk a ni.