3015/2024-2025

Aizawl the 14^th November, 2024: Vawiin chawhnu dar 2:30 khan Mizoram State Disaster Management Authority(MSDMA), National Disaster Management Authority(NDMA) leh Ministry of Home, GoI tangkawp buatsaihin, Conference Hall, Mizoram Legislative Assembly Secretariat Annexe -ah “State Level Mock Exercise On Flood And Landslide In Mizoram” thlirletna (DEBRIEFING) meeting neih a ni a. DM& R Minister Pu K.Sapdanga chuan khuallian niin hun a hmanpui.

Khuallian Pu K.Sapdanga chuan  Mizoram pum huapa tuilian leh leimin avanga chhiatna dang danga a lo thlen thulha chet lak dan tur enchhinna (Mock Drill on Flood & Landslide in Mizoram) hlawhtling taka buatsaih a nih theih chu lawmawm a tih thu sawiin, mock drill hlawhtling tak buatsaih a nih theih nana  thawktu zawng zawng: Mizoram sawrkar hnuaia Department  hrang hrang te leh India sawrkar laipui hnuaia agency hrang hrang te bakah  kan tlawmngai pawl te,local council leh village council te leh Mizoram mipui hnena lawmthu  ka sawi tak zet a ni, a ti. Sawizawmin Pu Sapa chuan khuarel chhiatna lo thleng thulha kan lo inven dan tur leh kan tawrhna tinep thei tura chet kan lak dan tur nunchan kan lo zir hi thil tihmakmawh a ni a, rah duhawm tak a chhuah ngei pawh ka beisei hle a ni tiin, kan hmalam hunah pawh chhiatrupna hrang hrang lo thelng thei puala Mock Drill chhenfakawm tak buatsaih zel hi sawrkar pawhin a ngai pawimawh hle a ni, a ti bawk.

Vawiin Debrifing meeting hi Brig.Ravinder Gurung (Retd), Sr.Consultant, (ME&IRS), NDMA, GoI chuan kaihhruaiin, District tina DDMA ten Video Conference Mode in meeting hi an lo chhim ve a. DDMA Chairman leh District bawrhsap ni bawk te leh district tina head observer ten vawiina Mock Drill an kalpui dan leh mock drill atanga an thil zirchhuah leh hmasawnna ngaina lai leh rawtna an neih ang ang te report an pe hlawm a ni. Chief Observer Pu PC.Lallawmsanga IPS( Retd), Former Principal Secretary, DM&R atang pawhin vawiina Mock Drill a hmuh dan leh rawtna a nei te ngaihthlak a ni bawk.

Brig.Ravinder Gurung (Retd), Sr.Consultant, (ME&IRS), NDMA, GoI hnen atang pawhin Mizorama Table Top Exercise leh Mock Drill kan kalpui dan chungchanga a  comment te ngaihthlak a ni a. Pu Gurung chuan Mock Drill buatsaiha India ram state hrang hrang a tlawh tawh zingah Aizawl Civil Hospital anga Civil Hospital thianghlim a hmuh loh thu a tarlangin, Mizoram chu Table Top Exercise leh Mock Drill buatsaihna kawngah India ram state te zingah pawh ti tha ber te zing a mi a ni, a ti bawk. Vawiin DDMA chairman leh observer te atanga report angaihthlak chu hlawk thlak a ti thu sawiin, amah pawhin  SDMA leh DDMA te hnenah rawtna a neih ang ang te a sawiin, Mock Drill  hian khualrel chhiatna a lo thlen palh hunah chiai mai lovin chet lak dan min thiam tir ang a, chu chuan nasa takin min pui dawn a ni, a ti.

Pi K.Lalrinzuali, IAS, Secretary, DM&R Dept. chuan lawmthu sawiin vawiin debriefing programme chu a khar ta a ni.