1712/2024-2025

Dated Kolasib the 23rd August, 2024 : Vawiin chawhma dar 11 khan Pu Lalfamkima, Dy. Speaker, Mizoram Legislative Assembly, Kolasib bialtu MLA ni bawk chuan Mizoram Journalists' Association, Kolasib District-ten anmahni puala Pension Scheme an ruahman chu Kolasib Press Club-ah a tlangzarh.

MJA, Kolasib District Pension Scheme tlangzarh ruala thu sawiin Pu Lalfamkima, Dy Speaker chuan, Kolasib District MJA-ten Pension Scheme ruahmanna chang an hria chu lawmawm a tih thu a sawi a. Mihringah hmalam hun atana ruahmanna nei thiamte an hlawhtling mai thin a. Healthcare-ah pawh sorkarah kan innghahna piah lamah mimal leh khawtlang huap pawha tihtheih a nih dante kan zir chian a ngai a; ngaihtuahna hmang thiam apiang an vannei mai a ni, a ti.

MJA member-ten an pension hnua mai par thlawn mai lova, pawisa tlem azawng an chhuahpui theih tura ruahmanna siam nachang an hria chu Kolasib District MJA te a nachang hriatna bakah huaisenna a ni tiin, fakawm a tih thu a sawi a. He scheme kalpuina kawngah harsatna te pawh a la awm maithei a, chhungte pawh chu inhnehtir mai lova, bei chho zel turin a fuih a, an kal zelna turah duhsakna a hlan a. Pension scheme bul tanna atan cheng nuai 1 a tumsak tur thu a sawi bawk a ni.

Dy Speaker chuan tunlai Kolasib boruak sawiin, kuminah kum dang aiin ruahtui a tla hnem a, state dangah pawh kawng a chhe nasa tih a sawi a. Kolasib District kawngpui chhia pawh siam hna thawktute blacktop turin inpeih vek mahse, khaw awmdanin a zir loh avangin duhthusam in hma an la thei lo a ni a ti a; khaw awmdanin a zir chho ang a, kawngpui pawh a that thuai a rinawm thu a sawi bawk.

MJA, Kolasib District President Pu Andrew Vanlalauva pawhin thu sawiin, hun kal tawhah Kolasib MJA te chu district dangte tan pawha entawn tur thil thar tichhuak fo thin an ni a, tuna Pension Scheme erawh hi chu district dangte kalpui dan entawn chungin leh Bank lama thawktute nena inrawnkhawmna neih hnuah hrual mum a nih thu a sawi a. Kolasib District chauh hi member-ten mahni thawhchhuah hmanga Pension Scheme siam an nih thu leh Member-ten pension kum an thlen huna pawisa tlem azawng an lo khawl theihna tura ruahman a nih avangin member-te pawhin Pension Scheme-a sum dah tur tuakna kawngah theihtawpa tan lak a ngaih thu a sawi a ni.

MJA, Kolasib District Pension Scheme tlangzarhna inkhawm, Kolasib Press Club-a neih hi Pu C. Zomuanpuia, Vice President, MJA, Kolasib District chuan a kaihruai a. Pu PC Lalthazuala, Secretary, MJA, Kolasib District chuan Pension Scheme a sawifiah a ni.

Pu Lalfamkima, Dy Speaker hi ZPM, Kolasib Block President Pu H. Lalruaia leh a thawhpuiten an tawiawm a ni.