1711/2024-2025

AIZAWL; the 23^rd August, 2024: Vawiinah khan Akashvani, Aizawl leh Government  Mizoram Law College tangkawp chuan Mizoram Law college Legal Chamber-ah Indian Independence lawmna pualin Independence Music Festival an buatsaih. Hon’ble Speaker of Mizoram Legislative Assembly Pu Lalbiakzama leh Dr. Esther L.Chhangte, Principal, Gov’t. Mizoram Law college te chuan Khuallian leh khualzahawm niin hun an hmanpui.

Vawiin Independence Music Festival-ah hian khuallian Pu Lalbiakzama chuan thu sawiin, Music hi mihring in lawmna kan neih lanchhuahtirna langsar ber zing a mi a ni a. Rimawi hmanga kan ram zalenna lawmna chang in hria hi a inhmeh ka ti hle a ni. Rimawi hmanga khawvel hriat a Zofate min phochhuak thin tu Akashvani Aizawl  leh  hun pawimawh tak a Akashvani te thawhpui nachang hria Mizoram Law College-te chungah lawmthu ka sawi a ni.  Music thiltihtheihna hian tawp chin a nei lo a, ‘Thu chu hla, hla chu thu a ni’, tih a ni a. Music hi thusawi, infuih tharna leh inpumkhatna hmanrua chak ber a ni fo. Rimawi chuan ramri, nunphung leh kum thliar hrang lo in mitin thinlungah thu a sawi nghal vek thei a ni, a ti.

Sawizawmin khuallian chuan  Kan chik ngai emaw, kan thiam loh tawng dang leh a awmzia kan hriat miah loh hla pawh pai miah lo in nalh takin kan sa thei a. Chu chu thu leh hla a music a special-na a ni. Music hian inhre ngai lo, hnam hrang leh ram hrang a cheng te pawh min kuah khawm thei tlat a ni. Mihring a hlim ber laiin hla hmangin a hlimna a puangchhuak a. Lungngaihna vawrtawp a tawrh pawhin music hmangin a tawrhna a lantir thin. Music chu mihring nun laimu luahtu a ni kan ti thei ang. Kan Bible-ah pawh bu hran ngat in “Hla Thlankhawmte” tih kan hmu a ni. Ram leh hnam phuarkhawmtu leh ti chak tu, indona mualah chan chhe tawp chan lai pawh a pasalthate chau tawh te fuihphur a, chakna thar petu chu music in a ken ‘Hnam Hla’ a ni fo thin. Music chuan mi beidawngte a kai tho a, huaisenna leh beiseina thar a pe thin a ni, a ti bawk.

Artist te fuihna thu sawiin khuallian  chuan,  in zai leh chevel kan hlimpui rual hian  Mizo kan nihna kan hlut theihna tur chi hla, incheina leh chezia ti lang chhuak fo teh u khai. Mizo ten musical tradition danglam tak kan neih heng lengkhawm zai te leh folk song kan neih te, LEIHKAPUI style kan tih mai lenglawng hla te hi hlut u i la, vawng nung i la, tihmasawn zel I tum ang u, tiin artist te a sawm bawk.

Law zirlai te hnenah pawh Khuallian hian fuihna thuchah sawiin, dikna tundin kawng a Mizoram hmalam hun hi in kutah a awm a. Dan leh hrai lam a kawng zawh thlangtu te tan a ka thurawn chu:  in hna kha sumdawnna rilru pu chunga in thawh chuan kan ramah hian dikna in a lailum a chang ngai dawn lo a. Rawngbawlna hna-ah in ngaih a, chanhai leh hnehchhiah tuar te chhanchhuah duhna rilru in put tlat erawh chuan Mizoramah Pathian rorelna tundin in a awm ngei in ka ring tlat a ni, a ti.

Vawiin Independence Music festival lawmna progrmme hi Pu DR. Lalropuia, Director(E) & Cluster Head chuan welcome Speech  sawiin, Independence music Festival huaihawt a ni chhan te a tarlang bawk. Khuallian leh Khualzahawm atanga thu sawi ngaihthlak a ni bakah, chhinlung Cultural Club ten  Cultural Dance & Independence Costume Parade an entir a. Certificate leh Radio semna hun leh  ‘on the spot Quiz on Indian Independence Day’ inelna leh lawmman semna hun te hman a ni  bawk. Programme kar lakah MZI zai pawl leh Law College zirlai te atangin zai ngaihthlak a ni bawk.

Vawiin programme hi Naupibau Marinmai IIS, Director Doordarshan, Aizawl bakah Akashvani Aizawl official te leh sawmbik mi tha hnem takin an chhim a ni.

Pu Samuel Z.Hrangate, Asst. Director (P) & Head of  Programme, Akashvani Aizawl chuan ‘Vote of thanks’  sawiin  vawiin programme hi a khar ta a ni.