2541/2024-2025

Dated Kolasib the 16 October, 2024 : Vawiin chawhma khan Mizoram Youth Commission Coaching Centre, Kolasib, 2024 Session hawnna chu MYC Coaching Centre building, Kolasib Vengthar-ah neih a ni a. Kolasib Bialtu MLA Dy. Speaker Pu Lalfamkima chuan hun a hmanpui. 

MYC 2024 Session hawngtu Dy Speaker Pu Lalfamkima chuan thu sawiin, Kolasib Bialtu MLA chhuak ta in Kolasib tana thahnemngai takin MYC Coaching Centre an neih theih nan hma a lo lak tawh thu sawiin, hun eng emaw chen hman tangkai tawk loh a nih hnuah an han tharthawh leh tur chu a lawmawm hle a ni, a ti. Pu Lalfamkima chuan Kolasib chu khaw nuam tak a ni, a ti a. Chutih rual chuan thalai rualte pawh in an awm danah duhtawk mai lova rualelna nena competitive exam te pawh an hmachhawn a ngai tih  an hriat a ngai a ni, a ti. An hlawhtlin lohna chhan chu an thiam loh vang ai mahin, rualawhna leh midang elna nei lova competition an hmachhawn thin vang  ni zawkin a lang a ni, a ti a. Sorkar tharah hna lak chungchangah party induhsakna a awm lo a, a thiam leh tha apiang lak an ni a, chuvangin thiamna nei tak takte tan zau zawkin hun a in hawng zel a ni, a ti bawk. Hlawhtling tur chuan tihtak takna a pawimawh tih sawiin, Lal Isua zuitu an nih chuan an thiltih zawng zawng ah tihtak meuha ti zel tura zirtir an ni, a ti. 

Deputy Speaker chuan miin tihtak meuha beia hlawhtlinna an neih chu a par chauh an hmu thin a, an hlawhtlin hmaa an beihna leh tawrhna  hriatpui a an beih ve a ngai a ni, a ti. 

Pu Lalmuan Puia, Project Director, DRDO, Kolasib pawhin thu sawiin, UPSC leh MPSC exam a lo beih tawha a tawnhriatte zirlai admission titharte hnênah share-in, exam inpuahchah dan te, khawtlanga inhman dan tawk te hriat a tul thu a sawi. 

Pu Andrew Vanlalauva, President, MJA, Kolasib pawhin thu sawiin, MYC, Kolasib Centre, 2021-a hawn tawh chu Kolasib thalaiten an hmang tangkai tawk lo tih a sawi a. Sawrkarin thahnem a ngaihna chu thalai, hna zawng mekten thahnemngai tak leh tih tak takna nena hma laa an chhunzawm a ngai tiin, Kolasib District-in Mizoram pum huap hna inchuhnaah tam zawk an tlin zel a tul thu a sawi bawk a ni.

Kolasib MYC Coaching Centre-ah hian Coordinator Pu Lalnunhlua, LDC pakhat leh Peon pakhat awmin, Dr Lallianzuali Chhangte (History) & Vanlalmalsawma (Economics) (Govt Kolasib College ve ve) Zoremmuana Ralte (Economics) (DRO, Kolasib) te chu faculty an ni a. September - December, 2024 Session chhunga zir turin admission ti zirlai 10 an awm mek a. Coaching Class hi Govt. Kolasib College-ah neih thin tur a ni.