Mizoram State Legal Services Authority leh Pachhunga University College te bultum in vawiin khan Pachhunga University College ah Pu R. Lalrinawma Deputy Speaker in Legal Aid Clinic a hawng.
Kan ram tana thil pawimawh tak leh hmasawnna tur Legal Aid Clinic chu Zirlai ten tangkai taka hman theih nise a duhsak thu sawiin khuallian Pu R.Lalrinawma chuan dan leh hrai hriat hi a tul in a pawimawh em em a, tumahin thubuai ka nei dawn lo a tih ngawt theih lova, kan pianchhuah atangin Ram Dan in min phuar nghal avangin Dan hi kan hriat a ngaia, khua leh tui tha chuan kan ram Dan te hi kan zah in kan zawm tur a ni a ti.
Mi thenkhat chuan Dan hi hnawk an ti in misual te ti huangtau tu ah an ngaih fo thu sawiin Pu R Lalrinawma chuan Dan hi misualte tan a hnawk zawk a, Dan chu khua leh tui tha te humhimtu niin kan hamthatna tur Dan a tama, kan hriat loh avanga kan buaina te a awm thin thu leh Dan chu misualte hrem tur zawka awm a niin, Sorkar chuan Dan hi khua leh tui ten zawm tha in thlamuang tak in awm thei se a duh a ni a ti a.
A huho leh haw haw chunga misual man chu a dik loh thu leh Dan ang zela man tur a niin Court in rorel a ngai a, thiam loh chang te chu Dan anga an chunga rorelna neih tur a niin mahni kutzala dan lo lek ve ngawt tur a ni lova, kan dikna chanvo hriat a pawimawh a ni, a ti a. PUC hmuna Legal Aid Clinic hawn chu lawmawm a tiin College naupang leh zirtirtu, hnathawktu te bakah helai chheh vela awm Dan hriat lama harsatna nei ten tangkai taka an hman tur in Legal Aid Clinic chu a mamawh apiang te hman turin a hawng a ni.
Dr Tawnenga, Principal, PUC vawiin programme kaihruai tu leh Pi Lalfamkimi, Advocate ten thutawi an sawi a, Pu Joel Joseph Denga, Member Secretary, Mizoram State Legal Services Authority in lawmthu sawiin a programme a khar.
