Vawiin khan Civil Hospital Aizawl, Auditorium-ah National Health Mission (NHM) hnuaia State Level ASHA and Community Process Mentoring Group Meeting vawi 9-na neih a ni. He meeting-in a tum ber chu Community Process/ASHA Programme tih chak niin a hlawhtlinna tur hian thawktute bakah mipuiten mawhphurhna sang tak an nei a ni.
Meeting hi Dr.K.Lalbiakzuala, Mission Director, NHM chuan a kaihruai a, ASHA Mentoring Group member-te lawmna thu sawiin ASHA pawimawhna te, khawtlangin an chhawr tangkai theih dan tur te leh hriselna kawnga ASHA te hnathawh dan turte a sawi a ni.
Dr. Lalchhuanawma, State Nodal Officer (ASHA) pawhin ASHA te hmalak dan a tarlang a. ASHA te chu mipui vantlang leh hriselna lam thawktu te inkar a leihlawn pawimawh tak an ni, a ti.
Chawhnu lamah ASHA te harsatna te, incentive an dawn that theih dan tur te leh tul dangte sawiho a ni bawk.
He meeting-ah hian National Health Mission hnuaia Programme hrang hrang a Programme Officer leh Non-Government Organisation(NGO) atangin Zoram Entu Pawl (ZEP), Mizoram Upa Pawl (MUP), Mizo Hmeichhe Insuihkhawm Pawl (MHIP) atangte in member te an kal khawm a. Dr. Lalthantluanga, State Programme Manager, National Health Mission chuan lawmthu sawiin hun hnung a khar a ni.
