Vawiin khan Deputy Speaker Pu R.Lalrinawma chuan 132 kv Sub-station peng atanga Bawngkawn Hmar Veng (Helipad) chung pawhna kawng R.Lalrinawma Road leh Zuangtui Community Hall a hawng. Deputy Speaker chuan khawtlang thahnem ngaihna avanga hmasawnna lo awm hi lawmawm a ti a. NGO hrang hrangte’n mawhphurna laa, lungrual taka an thawhrimna chu vawiin ni-ah a lo lang a ni a ti bawk a. Khawtlang inlungrualna chuan rah tha tak a nei thin a ni tiin a sawi.

R.Lalrinawma Road hi MLA Fund atangin Rs 700,000 seng a siam a ni a.  A thui zawng hi 310 metre niin, a zau zawng hi 3.5 metre vel a ni a. JCB leh Hitachi-a laih a ni. Leivung trip 400 chuang paih a ni a, inhlawh zat hi mi 270 vel an ni a. Zuangtui atanga Bawgkawn Hmar Veng hnaih phahna hi 1 km vel a ni.

Zuangtui Community Hall hi a tirah chuan Ni 100 inhlawhna hmangin Hall hmun laih a ni a, MP Fund (Rs 700,000) in bul tan a ni a, MLA Fund  Rs 500,000 a sak pum a ni. Hall hi 74 feet a sei a ni, 31 feet a zau leh 16 feet a sang a ni. Rest room leh Volley Ball Court te pawh siam a ni.

He hawnna hunah hian Zuangtui Cultural Club ten Sarlamkai an entir a, Deputy Speaker chuan Zuangtui YMA Branch buatsaih Volley Ball Prize semna a neih pui bawk a ni.