Nimin May ni 4, 2018 khan Indian Road Congress Mid-term Council Meeting vawi 215-na chu Mizoram University Auditorium-ah neih tan a ni a. INC Council Meeting hawnna hi sorkar laipuia Road Transport & Highways, Shipping, Chemical & Fertilizers Union Minister Pu Mansukh L. Mandaviya-in a rawn hmanpui a. Amah rual hian India sorkara  Director General (Roads) & Special Secretary Pu Manoj Kumar; Indian Roads Congress President Pu KS Krishna Reddy leh IRC Secretary General Pu SK Nirmal te an rawn tel bakah Mizoram sorkar atangin PWD Minister Pu Lal Thanzara; Principal Secretary PWD Pu Lalram Thanga leh PWD Engineer-in-Chief Er. R. Vanlaltluanga ten an tawiawm bawk a ni. 
Khuallian Union Minister Road Transport & Highways, Shipping, Chemical & Fertilizers Pu Mansukh L. Mandaviya chuan Indian Roads Congress inrelbawlna leh hmalakna a fak a; he pawlah hian engineer-te chauh ni lo, contractor te, consultant te, scientist te, retired official te leh zirlai engemawzat pawh an tel avangin he pawl hi an ti hluin, an hmalakna pawh a chak thin a ni, a ti. Khawvel thang chak takah hian ram changkang zawkte um pha tur chuan hun a danglam ang zelin keimahni pawh inthlak danglam thiam a ngai a, khawvela ram thiltithei ber nih tur chuan infrastructure thaah kan hausak a ngai phawt a ni, a ti bawk. Tun hnaiah rampumah demonetisation leh GST hman a ni a, hei hian nasa takin ram sum dinhmun pawh a tidanglam a, budget hnuhnung berah infrastructure siam belhna atan ringawt pawh cheng vaibelchhe nuai 21 (21 lakh crores) dah a ni nghe nghe  a ni, a ti. Mizoram hi organic farming atan chuan a ram leilung hi duhthusam a ni a, Chemical fertilizer Minister pawh ni mahila Mizoramah hi chuan organic farming chauh tih nise, heta thei leh thlai tharchhuahte chu state pawn leh ram pawn thlenga hralhchhuah a nih theih nan kawng tha leh inkalpawhna dangte pawh tha leh changtlung tak siam chho a pawimawh dawn a ni, a ti bawk. Chu bakah science thiamna hmanga, tunlai technology thar leh tha ber berte pawh thiam taka hman tangkai a pawimawh a, hmasawnna tak tak thlen tur chuan sorkar leh mipuite tangrual a, thawkho a ngai a ni, a ti. Union Minister hian IRC Documents for 2017-2018 a tlangzarh  nghal bawk a ni. 

IRC Council Meeting hawnna inkhawmah hian Mizoram PWD Minister Pu Lal Thanzara pawhin thu sawiin Mizoramah a vawi hnihna atan IRC meeting nghah a ni thei chu a lawmawm takzet a ni, a ti a. Mizoram chu state te berte zinga mi ni mahse thang chak em em leh a chhunga cheng mipuite pawh khawpui nunphung (urbanization) la chak em em an ni a, chuvangin kawng tha leh inkalpawhna tha chu mipuite an mamawh hle a ni a ti a. Mizoramah ruah tlak hun fur hi a rei thin em avangin duh angin kawng siam hna a thawh chak theih lo chu a pawi hle a, amaherawhchu tun hnaia Sorkar laipuiin 'Bharat Mala' hnuaiah hmalakna thar nasa tak a nei chho tur chu Mizoram tan pawhin malsawmna a thlen ngei a beisei thu a sawi. Mizoram leilung awmdan leh tlangram a nihna te hre rengin tuna IRC Meetingah pawh hian Mizorama kawngpui siam dan tur ruahmanna  tha zawk ngaihtuah chhuak tura chahin Pu Lal Thanzara chuan IRC chhim tura lo kal zawng zawngte duhsakna a hlan a; IRC Souvenir a tlangzarh nghal bawk a ni. Health Minister a nihna angin sorkar laipuiin Mizoramah medical college din nana pawmna leh phalna a pek chungah lawmthu a sawi bawk a ni. 

IRC Meeting ah hian Director General (Roads) & Special Secretary Pu Manoj Kumar; Indian Roads Congress President Pu KS Krishna Reddy, IRC Secretary General Pu SK Nirmal leh Mizoram PWD Principal Secretary Pu Lalram Thanga te pawhin thu an sawi a. IRC Council Meeting hi ni 2 a awh ang a, ramchhung state hrang hrang atanga palai lo kalte chu Pathianni-ah Aizawl leh a chhehvela enpui an ni bawk ang. 

Attachment

  • Loading attachment...