Vawiin kha National Rural Livelihood Mission (NRLM) hnuaia thingtlang mite'n mi dang kuta innghat lova mahnia ei zawnna an neih theihna tura hma lakna puala ni serh 'Aajeevika Diwas' (Livelihood Day) a ni a. Lawngtlaiah chuan DC Conference Hall-ah Lawngtlai RD Block hnuaia Self Help Group (SHG) hrang hrang member-te ko khawmin hun hman a ni.

He hun hi Lawngtlai BDO charge la mektu Sub-DC Pu Vabeimozachhi Chozah MCS chuan kaihruaiin, hun hman a nih chhan a sawi fiah a. India rama cheng mipui tam zawk chu thingtlang mi rethei, ei zawnna mumal pawh nei lo an ni a, chu'ngte khai chhuaha tihhmasawn nan chuan sawrkar laipuiin ruahmanna lian tak (NRLM) a nei a, chumi hmang chuan thingtlang mi harsa zawkte'n khawsak dinhmun duhawm zawk an nei mek a ni, a ti a. NRLM hnuaia thingtlang mite ei zawnna bul tan nana inpui tawn tura SHG din chu a hlawhtlinna a lang chho mek a, a lo lar zel a, mi tam zawkin an chhawr theih nan hma lak zel tum a ni, a ti.

Chawntlangpui CF (Cluster Facilitator) Pi ST Thangruaii chuan hunserh hmangin, Block Mission Manager (BMM) Pu R. Zodinsanga chuan MzSRLM (Mizoram State Rural Livelihood Mission) chungchang leh SHG din hmanga thingtlang mi harsate khawsak chawi kan kawnga hma lak mek dan leh a hlawhtlinna te a sawi a. Ngengpuikai CF Pi Janet Lalhmingsangi leh Mampui CF Pi F. Vanlalthlangi te chuan an khuaa SHG an kalpui dan leh an hlawhtlinna te an sawi a. Canara Bank, State Bank leh Apex Bank atangin mi harsa zawkte leh thingtlang mite tana bank hnuaia hamthatna awm thei ruahmanna hrang hrang leh a buaipui dan tur te ngaihthlak a nih bakah, Health Department atangin thingtlang mite khawsak chawi kang tura hriselna pawimawhzia leh hriselna lama hma sawnna tura Health Department hnuaia hamthatna awm te ngaihthlak a ni bawk a. Cluster Coordinator Pu Lalropuia’n SHG pawimawhna leh hmeichhiate dinhmun chawi kan pawimawhna a lem nen entira sawi fiahin, lawm thu sawiin hun khar a ni.

Vawiina Aajeevika Diwas hmannaah hian mahnia ding chhuak tura ei zawnna kawhhmuha chher hriamtu ruahmanna DDU-GKY leh RSETI chungchang zawh fiah leh inziah luh nghal theihna Kaushal Panjee registration counter buatsaih a ni a. Mudra Loan leh bank hnuaia hamthatna hrang hrang dil theihna form sem chhuah a ni bawk.