Vawiin khan Power & Electricity department hmalakna in Saiphai ah 33KV sub-station hawnna hun hman a ni a, P&E Minister Pu R. Lalzirliana chu Khuallian niin Bialtu MLA Pu K.Lalrinthanga khualzahawm a ni bawk. MLA Pu PC Zoramsangliana leh Pu R.Vanlalvena, P&E department hotute bakah Saiphai khawtlang hruaitute leh Saiphai mipuiten he hunah hian an hmanpui.

Minister PuR.Lalzirliana chuan ram hmasawnna kalpui nan chuan remna leh muanna a awm hmasak a tul thu a sawi a, P&E department in hmalakna hrang hrang an kalpuite tarlangin Saiphai khawmipuite chuan neitu nihna thinlung nena an khua a khawlthar bun chu uluk taka enkawl turin a chah a, heng khawl bunna tura hmunhma petute lakah lawmthu a sawi bawk.

Saiphai 33kV sub-station hawnna programme hi Pu H. Lalengmawia, IAS, P&E Secretary in kaihruaiin, Bialtu MLA PuK.Lalrinthanga, PuR.Vanlalvena leh Pu PC Zoramsangliana ten thusawina hun an hmanga, Saiphai VCP Pu R.Lalramnghaka’n lawmthu sawina hun hmangin mi pawimawh sawm bikte hnenah Tawlhlohpuan hlanna hun a nei bawk.

Saiphai 33kV sub-station hian Saiphai, Saipum leh Chawnpuite chawm tura ruahman a ni. Saiphai leh a chhehvel khuate hi Bilkhawthlir atangin 11kV level in hruisei tak hmanga kawlphetha pek an nih thin avangin harsatna hrang hrang a awm thin a, chung harsatna te chu he sub-station hmang hian sutkian a nih phah a ni. He hnathawh nan hian Nuai 623.93 hmanral niin, 90% hi North Eastern Council in a tum a, 10% hi Mizoram sawrkar in a tum bawk a ni. Hna hi Ni 26 Feb 2014 ah thawh tan niin Ni 31 March 2018 ah thawhzawh a ni.