Mizoram Legislative Assembly Deputy Speaker, Aizawl East-I bialtu MLA chuan a bialchhung Sihphir Higher Secondary School leh Urban Public Health Centre hnenah vawiin khan a office chamber-ah thilpek a hlan.

Pu R.Lalrinawma chuan khawtlang tangrualin Higher Secondary School an din tluang taka a kal zel chu lawmawm tiin khawtlang mipui inpekna avangin private Higher Secondary School tha tak an nei thei a ni, a ti a. Principal leh zirtirtute thahnemngai taka thawka result tha an neih chhunzawm zel a beisei thu a sawi.

Deputy Speaker chuan Sihphir PHC a Doctor, Nurse leh thawktu dangte fakin an rawngbawlsak bial chhung mipuiten an thlamuanpui a, an inpekna avangin an chungah mipui an lawm hle a ni, a ti. Deputy Speaker Pu R.Lalrinawma chian Sihphir Higher Secondary School hnenah white board pathum, guitar leh revolving chair a pe a. PHC tan hian water cooler leh steel almirah a pe a ni.

Thilpek hlanna programme tawi buatsaihah hian Sihphir Higher Secondary School Principal leh zirtirtu te, Sihphir PHC doctor leh staff-te bakah Sihphir VCP leh VC member-te, YMA hruaitute an tel a ni.