Prime Minister Pu Narendra Modi kaihhruaina hnuaiah vawiin khan Rashtrapati Bhawan New Delhi ah Central Minister thenkhat leh State hrang hrang Chief Minister leh Union Territory-te Lt. Governor te telna Inter State Council meeting vawi 11-na chu neih a ni a, he meeting ah hian Chief Minister Pu Lal Thanhawla pawh telin thusawina hun a nei a ni.

Chief Minister Pu Lal Thanhawla chuan Niti Ayog Governing Council thutkhawmna hmasa berah Prime Minister Pu Narendra Modi’n ram tana a hmathlir zau leh ropui tak, a rawn chhawpchhuak a, heng hmachhawpte tihlawhtling turin Inter State Council hian pawimawhna a nei thui hle a ni, a ti a. Mizoram chuan Prime Minister hmathlir ropui tak ti hlawhting turin theihtawp a chhuah tur thu sawiin Hmarchhak state te hi hetiang ti thei tur leh state ten hemi thilah an mawhphurhna zo taka an hlenchhuah zel theihna turin Sawrkar Laipuiin kawng tinrengah state te hi a tanpui leh a chhawmdawl a ngai a ni, a ti.

Aadhar chungchang sawiin Chief Minister chuan khua leh tui dik tak te chauh hian Aadhar number an nei tur a ni a, Hmarchhak state te hi ram dang nen ramri intawm kan nih avangin khua leh tui nilo ramdang miten diklo taka Aadhar an neih theih loh nan a bik takin fimkhur a tul a ni, a ti a. Mizoram a Aadhar card pek chhuah chu a muan thu sawiin a chhan ber chu Central Sawrkarin Aadhar pekchhuahna atan a rawih agency ten thil an ngaihzam vang a ni, a ti a. Direct Benefit Transfer tha taka mitin thleng phak turin internet inthlunzawmna leh thingtlanga bank te inzarpharhna lamah abika hmalak a tul thu a sawi.

Hmarchhak biala thiamna bik (skill) nei chu za zelah 5 chauh an nih thu leh kum 15 leh kum 29 inkar mi za zelah 40 vel hna nei lo an awm thu tarlangin Pu Lal Thanhawla chuan Skill Development hi ngaihpawimawh zual bik a tul a, hei hian industry leh private sector awmlohna tia sawi theih Hmarchhak biala thalai tam tak tan an mahni ke a dinga, an mahni puala eizawnna kawng a hawn sak thei a ni, a ti a. Zirna chungchang sawiin Chief Minister chuan Elementary leh University thlenga zirna te hi awmze nei taka inzawm a tul a ni tiin Hmarchhak a zirna in leh zirlai te chu kawng hrang hranga chawikan a, thuamthat an ngaih thu a thusawiah hian a tarlang bawk a ni.

Ramchhung venhimna chungchang sawiin Chief Minister chuan sakhaw lama firfiaknate, sum leh pai dinhmun a hnufual bikna, mi thenkhat ten ngaihsak loh bik nia an inhriatna te, thalai te tan eizawnna leh remchanna awm lo lutuk te leh hmun thenkhata ram leilung fate dinhmun derthawng mekte hi tharum leh buaina chhuah tamna chhan ber anih thu sawiin firfiakna atanga tharum rawn irhchhuak chu khauh taka ti mih a ngai a, mahse chhan dang vanga tharum chhuah nate hi chu hmasawnna fuankim leh tluantling a awm leh mite ngaihsak inrelbawlna tha neihin engemaw chen hengte hi tihkiam theih ka ring a ni, a ti a. Dan leh thupek kengkawhtu Police tihchangtlun belh theih kawng hrang hrang a thusawi ah hian a tarlang bawk a ni.

Mizoram chuan remna leh muanna chu hun khirh tak kum 20 lai a paltlang hnua a hmuh thu sawiin remna leh muanna hlu tak kan neih hi theihtawpin kan vawnghim zel a. Tunhnaia Bangladesh a mifirfiakte chetna chu Hmarchhak pum tan a hlauhthawmawm thei a chu mai bakah Golden Triangle kan hnaih avangin ralthuam leh damdawi tawlhrukna te punbelh theihna a awm thei a chuvangin ramri te hi uluk leh zuala venhim a tul a ni a ti a. Mizoram anga state pachhia tan chuan heng thil te hi kan sum hnar neihsa ringawt atang chuan a zawng zawng tih a harsa a, sumpai mamawh leh sumpai awmte hi a inthlau hle thin a, chuvangin Central Sawrkar chuan Hmarchhak state te tan za a za, 100 percent grant angin a hranpa ruahmanna separate package siam se tiin a duh thu a sawi a ni.