Ni 16th July 1946 khan Mizorama hmeichhe pawl hmasa ber ‘Mizo Hmeichhe Tangrual’ chu Bawrhsap L.L.Peters phalna laiin din tan a nih atangin vawiin hi he pawl din kum 70-na a ni a. Vawiin khan MHT kum 70-na lawmna chu MHT Working Women’s Hostel, Khatla-ah hman niin Khuallian Social Welfare Minister Pu PC Lalthanliana leh Khualzahawm Pi Vanlalawmpuii Chawngthu, MLA & Chairman, Mizoram Women’s Commission ten an hmanpui.
MHT Platinum Jubilee lawmna inkhawm MHT President Pi C.Biakchhingi kaihhruaiah Khuallian Pu PC Lalthanliana chuan Mizo hnam leh khawtlang tana MHT-te hnathawh a ropui a tih thu sawiin Jubilee chibai leh duhsakna a hlan a. Sorkar pawhin naupang, fahrah leh chanhai zawkte chawikan a tum zel a, Social Welfare Department-in Home hrang hrangte tanpuina a pek thin zingah MHT chu a hmang tha ber pawl an nih thu a sawi. Tun dinhmunah Social Welfare Department chuan Children’s Home 24 tanpuina an pe mek thu sawiin Minister chuan kan ramah hian ‘fahrah’ tia sawi tur awm tawh lo hial se a duhthusam a ni, a ti. India rampuma hmeichhiate hamthatna tura din Universal Women Helpline chu Social Welfare Depatment kaltlangin Mizoram-ah pawh tan a ni tawh a; sorkar laipui phalnain District tinah ‘One Stop Crisis Centre’ pawh din tum a nih thu bakah hmeichhia tharum thawhna vanga harsatna tawkte a bik taka enkawlna tur damdawiin pawh sak tum a nih thu a sawi bawk.
Khualzahawm Pi Vanlalawmpuii Chawngthu pawhin MHT kum 70 tlin lawmna chibai leh duhsakna a hlan a. Sorkar duhsaknain Mizo hmeichhiate pawh ram rorelnaah tel ve theih nan reservation pek an ni a, hemi hmanga inthlanna mipui aiawh tura thlan tlinte chuan theihtawp chhuah an makmawh a ni a; an hnathawh that leh that lovin hmeichhiate hmalam hun a hril dawn a ni, a ti.
Mizo hmeichhe Tangrual hi ni 16.7.1946 khan Mizo High School, Mission veng, Aizawl-ah din tan a ni a; an President hmasa ber chu Pi Lalthanzami w/o K.T.Khuma a ni. MHT Conference hmasa ber chu ni 26-28.1.1948-ah neih a ni a, General Assembly hmasa ber chu ni 12.3.1949 khan hman a ni. Mizo Hmeichhe Tangrual-in an tum ber Mizo hmeichhia leh naupangte dinhmun chawikawn leh tihhmasawn a nih angin an din tirh atanga tun thlengin fahrah leh naupang awmna ‘Motherless Babies’ Home’ bakah Working Women’s Hostel an enkawl mek a ni.
Social Welfare Department chuan Integrated Child Protection Scheme kaltlangin MHT enkawl lai fahrah leh hmeichhiate enkawlna hmunte hi tanpuina an pe thin a. Kum 2013-2014 chhung khan he Scheme atangin Rs.7,64,100; kum 2014-2015 chhungin Rs.19,74,600 leh kum 2015-2016 (1st Installment) chu Rs.9,76,140 a ni. ICPS fund hmuh atanga Home staff lakte chu Superintendent, Counsellor, Case Worker, House Mother/Father, Para-medical staff, Storekeeper-cum-Accountant, Cook, Helper leh Housekeeper te a ni.
