Lawngtlai Open 2016 Mizoram Badminton Ranking Tournament chu nimin (July ni 15, 2016) khan khelh zawh a ni a. Tlai dar 3:30-ah Electric Veng YMA Hall-ah tournament kharna inkhawm hi buatsaih a ni.

He huna Khuallian LADC Executive Member i/c Sports & Youth Services Pu T.Zakunga chuan Lawngtlai District Badminton Association (LTDBA)-in Mizoram ranking tournament a thleng thei chu lawmawm a tih thu a sawi a. LADC-in sum tlem te nei chungin theihtawpin district infiam mite tan hma a la zel a; state level infiamna hrang hranga pathumna chin tan lawmpuina (cash incentive) pe thinin, tun tumah pawh hian lang an awm a nih chuan pek an nih tur thu a sawi a. State sawrkar leh sport association hrang hrangte chu Lawngtlai District infiam mite hmasawnna ngaihtuahpui turin a sawm nghal bawk.

Khual zahawm Mizoram Badminton Association (MBA) President Pu C.Zorammuana, MPSC member ni bawk chuan infiam mite tan insum theih a pawimawhzia sawiin, chak reng thei tur chuan ei leh in, zuk leh hmuama insum tlat a pawimawh a ni, a ti.

Kharna inkhawm hi Organising Chairman Pu H.Dolianbuaia, Lawngtlai DRDA Project Director-in a kaihruai a. Organising Committee Secretary Pu Lalduhzuala'n report pein, LTDBA President Pu Vanlaltanpuia'n lawm thu a sawi a. District Child Protection Society, Lawngtlai atangin Pu Tommy Hmingdailova'n thu a sawi bawk.

Lawngtlai Open 2016 hi July ni 12, 2016 atang khan Electric Veng YLA Hall leh College Veng YLA Hall-ah khelh a ni a. Category hrang hrang 11-ah player 113 chhuakin, match 113 khelh a ni.

He tournament-ah hian Mens' Singles-ah RK Manojit Singh, Saron BC a champion a. Womens' Singles-ah Lalrinzuali, Tuikual BC a champion bawk.