Home Minister Pu R. Lalzirliana chuan Central Training Institute, Sesawng atanga 35th Batch Mizoram Home Guards & Civil Defence Recruit Volunteers Course leh 8th Batch Excise & Narcotics Department Basic Course training chhuakte Passing Out Parade nimin (15.07.2016) khan a hmanpui.

Home Minister chuan thiamthil hrang hrang zir a training chhuakte chu a lawmpui thu sawiin, tunlai khawvel hmasawnna in a ken tel sualna hrang hrang laka ram mipuite vengtu tur an nih angin an hlawh phu tura tha taka an thawh a beisei thu a sawi a. India danpui leh hnam puanzar hnuaia an thuthiam te chu nghet taka vuan tlat tura chahin, tlin taka an hna leh mawhphurna hlen tur chuan hriselna tha leh insumtheihna neih a pawimawh thu a sawi a. Mizo leh Kristian kan nihna kan hriat reng chuan thlemna kan do thei thin ang tiin, mahni nihna hrechiang chu mi zahawm leh hmantlak an nih thin thu a sawi a ni.

Transfer and posting chungchang sawiin Minister Pu R. Lalzirliana chuan hmun khata NGO, Kohhran leh pawl hran hrana inhman thuk chhuanlam vangin Sorkarin hmundanga a sawnna order pawh zawm theilo an awm thin chuan kan hnaah kan chian tawklo thin zia a tilang a ni, a ti a. Kan service-na apiang hi ram leh Pathian tan kan rawngbawlna a nih vek thu sawiin, NGO leh thildanga kan nihna chu kalsan theihlo emaw intih loh tur a ni, a ti bawk.

Training Course hi January ni 15, 2016 atang khan neih tan a ni a. 35th Batch Mizoram Home Guards (MRHG) Recruit Volunteers Course-ah hian Recruit 35 (Guardman 26 leh Women Homeguard 9)-in training zawmin, 8th Batch Mizoram Excise & Narcotics (MEN) Basic Course ah hian recruit mi 40 (mipa 25 leh hmeichhe 15) ten training hi an rawn zawm a; an vai hian hlawhtling takin course an zo hlawm a ni. Tihian Mizoram Home Guards (MRHG) Recruit Volunteers 35-te tiam hian CTl atanga MRHG&CD Recruit Volunteers training zo tawh chu mi 1,592 an ni tawh a. Mizoram Excise & Narcotics (MEN) Basic Course atanga Pass Out-te hi Sub inspector -11, Wireless Operator-1, leh Constable — 28 te niin, anni tiam hian CTl atanga Mizoram Excise and Narcotics Basic Course training zo tawh chu mi 389 an ni bawk.

Thla 6 chhung training-ah hian heng Department pahnih atanga recruit-te hian Training Officer, Instructors leh Asst. Instructors-te enkawlna hnuaiah Outdoor leh Indoor subject hrang hrang — Physical Training (PT), Drill, Weapons Training(WT), Fieldcraft, Battlecraft, Disaster Management, Map Reading, Rescue, First Aid leh Tactics bakah Classification Firing-te an zir a. Department Officers-ten Departmental Subject hrang hrang an zirtir bawk a ni a. Training chhunga titha zual thlanchhuahte chu - Best All Rounder-ah Lallawmkima (MRHG&CD), Best Shooter-ah Clinton Vanzarzoliana (END), Best in Discipline-ah R. Lalnunzira (END), Best in Drill-ah Lalawmpuia (END) leh Best Turn Out-ah KC Ramnghinglova (MRHG&CD)-te an ni.

Home Minister hian Sesawng a Passing Out Parade a hmanpui zawh hian nimin vek a Sesawng pan a kal Police Motor chesual vanga hliam tuar Hav. B. Laltanpuia, Aizawl Civil Hospital-a enkawl mek chu a tlawh nghal a ni.