3089/2023-2024

2023 Pawltlak thla ni 18: Mizoram Legislative Assembly Deputy Speaker Pu Lalfamkima, Kolasib Bialtu MLA chuan vawiin khan Kolasib Press Club tlawhin, Mizoram Journalists' Association (MJA), Kolasib District member-te nen inkawm hona hun an hmang.

Deputy Speaker Pu Lalfamkima hi ZPM Kolasib Block hruaitute'n ṭawiawmin, Kolasib District Information & Public Relations Officer Pu C. Lalhruaitluanga leh MJA Kolasib District member-te'n an lo dawngsawng a ni.

Pu Lalfamkima chuan Pathian malsawmna leh bial mipuite duhsakna azara MLA-a thlan tlin a nih avang leh Deputy Speaker dinhmunah hial hlan kai a nih avanga a lawm thu a sawi a. Theih tawpa ram leh khawtlang hmasawnna atan hma lak a tum thu sawiin, mipuite fin chhuahna, thawhpuina leh ṭawiawmna a ngen a. Mipui rorelna sawrkarah chanchinbu mite an pawimawhin, sawrkar ṭha dinna kawngah an thawh hlawk hle tih sawiin, District MJA te chu ram leh hnam tan ṭhahnem ngai taka thawk zel turin a chah a. Sawrkar thar chu mipui sawrkar a nih angin mipuiin an beiseina a sang hle tih sawiin, mipui beisei ang ngeia ṭhaa hma lakna kalpui turin road map duan sa angin rim takin hna an thawk dawn tih a sawi a ni.

He inkawm hona hun hi District MJA President Pu Andrew Vanlalauva'n kaihruaiin, Vice President Pu R. Lalhmingthanga'n ṭawngṭaina hun a hmang a. Mahni inhmelhriattirna hun hman a nih bakah, Kolasib DIPRO Pu C. Lalhruaitluanga'n thu a sawi bawk a. Ram leh khawtlang hmasawnna atana ngaih pawimawh zawngte sawi ho zui a ni bawk.

Inkawm hona hun hman zawh hian Deputy Speaker chuan Kolasib Press Club chhung chu fang kualin, Conference Hall thar tur buatsaih mek chu a en nghal a ni.