Vawiin khan DIET (District Institute of Education and Training) Aizawl chuan an auditorium-ah Teachers’ Day 2014 an lawm. He hun hi Pu G. Lalngaizuala, Vice President, DIET (A) Trainees Union chuan kaihruaiin, DIET Principal Pu Lalnuntluanga Hnamte, Vice Principal Pu Rosiamliana Ralte bakah senior lecturer, lecturer, instructress leh zirlai thahnem tak an tel a ni.

Principal Pu Lalnuntluanga Hnamte chuan zirtirtute chawimawina ni hlimawm tak an hmang thei chu lawmawm tiin, zirtirtute chu an hna ah theihtawp chhuah zawm zel turin leh, zirlaite nen an inkarah inpawhna tha taka awm se a tih thu a sawi a. Vice Principal Pu Rosiamliana Ralte chuan zirlai lehkhabu chhung thu mai bakah nitin khawsakna atana tangkai tur zirtirna pek chu zirtirtu hna anih thu leh, zirtirtu tling tak ni tura zuk leh hmuam, ei leh in leh incheina lamah thleng pawh zirtirtu tan chuan fimkhur a pawimawh thu a sawi bawk.