Vawiin khan rampum rualin Mizoramah pawh zirtirtute chawimawina ni 'Teacher's Day' vawi 52-na hman a ni a. Lunglei-ah chuan Govt. High School kawtah MZP Hqrs. Lunglei huahawtin he Ni lawmna hi hman a ni a, Parliamentary Secretary i/c Education Pu Joseph Lalhimpui chuan Khuallian niin he hun hi a hmanpui a ni.

Teacher's Day lawmna inkhawm MZP Hqrs. Lunglei Vice-President Lalrammuanawma kaihhruaiah Khuallian Pu Joseph Lalhimpuia chuan Mizoram sorkar aiawhin zirtirtu zawng zawngte chibai bukin duhsakna a hlan a. Zirtirtute thahnemngaihna leh inpekna avangin Zofate zingah mithiam leh ropui tak tak engemawzat chherchhuah an ni tawh a, vawiina zirtirtute pawh hian an zirlaite chu an 'mission' an nihzia hriain ram leh hnam tana rohlu an ni thei turin theihtawp chhuah zel turin a chah a ni. Mizo zirlaite hi ruahmanna tha siamsak an nih chuan ramdang naupangte aiin an duai bikna a awm lova, chuvangin zirna hi sorkar pawhin ngai pawimawhin zirtirtu indaihlohna pawh theih ang anga phuhruk turin hmalak mek a nih thu Parliamentary Secretary chuan a sawi a ni. Zirtirtute thlavang hauh a tulnaah chuan sorkar pawhin an thlavang a hauh na hle dawn thu sawiin Pu Joseph Lalhimpuia chuan lungawi lohna entir nana rilru thianghlim tak sikul naupangte hmatheh an nih thin chu pawi a tih thu a sawi bawk. Sorkar chuan zirtirtute hamthatna tur ngaihtuahin Lunglei-ah pawh 'Education Guest House' sak nan Cheng nuai 100 chuang a dah tawh a, hna pawh tan thuai a beisei thu a sawi bawk a ni.

Teacher's Day lawmna inkhawmah hian Anti-Tobacco Squad, Lunglei District Meber-Secretary Dr.S.R.Ngurchamliana chuan vaihlo chungchang hriattur pawimawh sikul naupang leh zirtirtu kalkhawmte hmaah a sawi a ni. Mizorama cheng mirhirng zingah zaa 67.2% chu zuk leh hmuam ti an nih thu tarlangin Dr. Ngurchamliana chuan Mizoram-ah kumtin vaihlo leh kaihhnawih lei nan leh chumi avanga damlo inentir leh enkawl nan Cheng vaibelchhe 500 chuang hmanral a nih thu a tarlang a. Anti-Tobacco Squad te hmalakna avangin Lunglei District-ah zuk leh hmuam ti thin zingah zaa 11%-12% chuan an nghei phah a, hei hi All-India (below 10%) aiin a sang zawk a ni, a ti a. Mizo hnam timualphotu vaihlo laka fihlim turin zirlaite a chah a ni.

MZP Hqrs. Lunglei Secretary K.Lalremruata chuan Report pein MZP chuan zirlaite hmasawnna tur kawng ta tak a dap mek thu a tarlang a; chung zingah chuan Lunglei-ah Edu Fest huaihawt te, 'Zo Nationalism' Campaign buatsaih te leh 'Career Awareness' programme huaihawt te a tel a ni.

Vawiin 52nd Teacher's Day lawmnaah hian Govt High School Pipe Band ten 'Band Display' hun an hmang a, zaithiam engemawzatin kalkhawmte zaiin an awi bawk a ni. He huna zirtirtu kalkhawm zawng zawngte chu MZP buatsaih chawimawina ngaihhrui Khuallian Pu Joseph Lalhimpuia'n a hlan nghal bawk a ni.