43/2022-2023
Mamit 5th April, 2022 : Vawiin khan District Institute of Education and Training (DIET) huaihawtin Thanks Giving Day hman a ni a. Pu Lalnunhlua, District Bawrhsap chuan khuallian niin a hmanpui.

Khuallian chuan hun rei tak mumal taka zirna In hawn theih a nih loh hnu-ah Sawrkar thu anga vawiin atanga hawn tan an ni leh ta chu lawmawm a tih thu a sawi a. Zirtirtu kan nih chuan zirlai naupang hmachhawn dan tur kan lo zir lawk a ngai a, chutiang atana DIET training centre chu buatsaih a nih angin training mekte pawhin thu mai nilo, a practical-a naupang zirtira hmachhawn dan thahnem ngai taka training turin a chah. Mihring nun chherhriama, a tha zawnga zirtirna pe thei tu chu zirtirtute an nih avangin nakin lawka kan khawtlang nun a chhia/a tha hi tuna classroom- zirtirtu te'n an zirtir mek naupang te ah hian a in nghat a ni a ti.

District Bawrhsap chuan Mamit District Aspirational District kan nihna atanga khaichhuah kan nih theihna tur atana pawimawh ber pawh zirna hi a nih avangin DIET Mamit-a zirlai awm mekte chu naupang kaihruai thiam tak ni tura zirchhuak turin a chah nawn a ni.

Pu Vanlalmawia Principal pawhin inlawmna thusawiin hrileng avanga class kal theih a nih loh avangin zirlai naupangte nen pawh duh anga an in pawh tawn theilo chu pawi a tih thu a sawi a. DIET Mamit atanga zirchhuak te chu an zirchhuahna hmun ti hmingthaa zirtirtu tha tak ni tura inbuatsaih turin a chah a ni.

DIET Mamit hi kum 2005 atanga din niin tunah hian Faculty member - 13 leh Non- Teaching Staff - 13 an awm mek a. Zirlai naupang 4th Semester 48 leh 1st Semester - 44 an awm mek bawk a ni.

He hun hi Pu K. Malsawmhlua, Lecturer chuan kaihruaiin Pi Vanlalrohlui Lecturer-in lawmthu sawina a nei a, Rev. Lalparchhuana'n Pathian hnena lawmthusawina a nei bawk.