Digidhan Outreach Campaign a kalchhuak tur te, tukin zing dar 8 khan ICT Department Secretary, Pu C. Lalhmachhuana chuan Secretariat Annexe-I kawtah a vailiam.
Digidhan Outreach Campaign hi India sawrkar laipuiin Digital Payment Services (Pawisa note tel lova thil lei leh hralh) chungchang in hrilhhriatna leh inzirtirna a kalpui mek niin sawrkar laipui Ministry of Electronics & Information Technology chuan Mizoram chhunga he campaign rawn nei tur hian Group M Team a rawn tir a. Campaign ah hian phone atanga e-wallet hman dan leh cashless transactions (pawisa note tellova in dawrtawnna) tih theih dan hrang hrangte zirtirin Aadhar Card hmanga digital payment siam dan (AEPS - Aadhar Enabled Payment System) te an sawifiah dawn a ni.
Campaign a chhuakte chuan February leh March thla chhung hian Aizawl District, Serchhip District, Lunglei District, Lawngtlai District, Mamit District leh Kolasib District te tlawhin heng district paruk chhunga khaw hrang hrang 56 -ah campaign an nei dawn a ni.
Vailiamna programme tukin zinga neihah hian campaign dan tur te tihchhin nghal niin Information and Communication Technology Department leh Mizoram State e-Governance Society officers leh staff-te an tel kim hle.
