Border Roads Organisation ‘Project Pushpak’ chuan kumin hian Mizorama an din kum 50-na chu lawmin tukin zing dar 7:00 ah ‘Golden Jubilee Run’ an buatsaih a, Mizoram Chief Secretary Pu Malsawma, IAS-in a vailiam. 'Golden Jubilee Run' kharna hun leh Jubilee lawmna inkhawm chu Aizawl Sipai Lammual-ah dar 9:00 ah an hmang chhunzawm a, he hunah hian Mizoram Governor Lt Gen Nirbhay Sharma, PVSM, UYSM, AVSM, VSM (Retd) chu Khuallian niin Jubilee Run-a tithate hnenah lawmman a sem nghal a ni. 

Golden Jubilee Run-a tlan zirna in hrang hrang atanga zirlai te bakah Ex-Servicemen leh mipui hmaah Mizoram Governor chuan Jubilee Run-ah phur taka tel thalai tam tak a hmu chu a lawmawm a tih thu a sawi a, Mizo thalaiten chin dan tha leh hriselna lam an ngai pawimawh chho zel avangin lawm thu a sawi bawk a. Mizoram mipuite, a bik takin thalaiten tanlakna chang an hriat a, kan zavaia kan tanrual thiam chuan ‘Mizoram Hrisel' kan siam thei a ni, a ti. Pushpak chu May ni 1, 1967 khan Mizoramah rawn inbun tanin, Mizoram state-ah hmasawnna chak taka kalpui a nih theihna chhan pawh Pushpak hmalakna zara kawngpui leh kawng tha state hmun kilkhawr ber thleng sial a nih vang a ni tiin BRO hotute leh hnathawk chungah lawmthu sawiin duhsakna a hlan bawk. 

Pushpak Golden Jubilee Run-ah hian lawmman category hrang hrang - Naupang, Ex-Servicemen, Kum 13-18 (Mipa & Hmeichhia), Kum 18 chunglam (Mipa & Hmeichhia) - te siam a ni a; heng bakah hian tlan zinga upa ber Pu Darrothanga (kum-85), Arhuan, Salem Veng leh naupang ber Mimi Vanlalthazuali (kum 7), Chanmari te hnenah Special Prize pek a ni bawk.  

Golden Jubilee lawmnaah hian Parliamentary Secretary Col. ZS Zuala; Border Roads Organisation Addl Director General (East) Dr. SS Porwal, VSM; Pushpak Chief Engineer Pu KK Razdan bakah mi pawimawh engemawzat an tel a; Golden Jubilee Run huaihawtna kawngah Sports & Youth Services Deparment-in an puihna zawng zawng chungah Pushpak chuan lawmthu a sawi bawk a ni.