Lunglei District Local Administration Officer Quarters chu vawiin chawhnu khan Lunglei HPC Vice Chairman Pu S. Laldingliana chuan a hawng a. Lunglei DC Pu K. Lalrohlua’n he hawnna inkhawm hi a kaihruai a ni.

Pu S. Laldingliana chuan department mite thawhrimna leh thahnemngaihna  avanga building tha tak sak a ni thei chu lawmawm a tih thu sawiin, an tanrual zia a tilang chiang hle a ti a. Lunglei khawpui bakah khaw hrang hrangah High Powered Committee (HPC) sum hmanga hna thawh mek a nih thu sawiin, District dang te neih ve loh, High Powered Committee kan nei hi kan vanneih hle a ni, a ti. Sawrkar duhsakna an chan chu awmze neia kalpui chhoh zel a tul tiin, Lunglei mipuite tana tangkai tur sawrkar hnathawk, tlawmngaipawl leh media te chu thurawn pe thin turin a sawm nghal a ni.

Pu Lalchawimawia, DLAO chuan lawmthu a sawi zawh hnuin technical report a pe a. HPC atangin kum 2015-16 khan cheng nuai 25 dawn a ni a, kum 2016-17 chhungin cheng nuai 10 dawn belh a ni. DLAO Quarters hi departmental a thawh a ni a, RCC structure a sak a niin, a floor area hi 1573.7 sq. ft a zau a ni.