Vawiin khan Secretariat Conference Hall, Aizawlah Digital Payment Seminar neih a ni a. He Programme ah hian Principal Controller of Communication Accounts (CCA) Eastern Region ni lai Pu G K Chin chu khuallian a ni.
Pu GK Chin chuan Aizawl khawpui chu Smart City atana thlan chhuah a nih angin Smart City hnuaia peng pawimawh tak Digital Payment/Cashless Transaction chu uar leh zual zawka kalpui a tul thu a sawi a. Pawisa a taka pek ngai lova internet hmang tangkaia khawpuia cheng ten thil an leia an hralhna tur cashless transaction-ah hian a bik takin Telecom Service Provider te an pawimawh dawn a, mipui mimir a tam thei ang berin an hman theih nan mobile app hman awlsam tak siam leh internet inthlunzawmna chak tha tak an neih a tul dawn, a ti a. Cashless transaction ah bank lam mawhphurhna pawh a sang hle tih sawiin Pu GK Chin chuan a chhawrtu mipuite ten harsatna an tawh loh nan theihtawp an chhuah a tul dawn a ni, a ti bawk.
Sawrkar laipuiin Smart City atana India ram khawpui 100 a thlan chhuah zingah Aizawl khawpui a tel avangin Digital Payment Mela hi buatsaih a ni a. Mizoram chhunga Telecom Service Providers hrang hrang -BSNL, Airtel, Vodafone, Reliance leh a dangte ko khawmin Bank hotute nen he seminar hi neih a ni. Controller of Communication Accounts, North East Circle atangin mi pawimawh engemawzat an tel a. Anni bakah hian Aizawl Municipal Corporation; Ministry of Communication, Department of Telecommunications leh Smart City kalpuitu Urban Development and Poverty Alleviation Department te an tel a. ICT Secretary Pu Vanlalchhuanga chuan Digital Payment leh Internet chungchanga Mizoram dinhmun sawiin State lian zawk te nena khaikhinin kawng thui tak zawh tur kan la nei, a ti a. UD&PA Secretary Dr.C.Vanlalramsanga pawhin Smart City chungchanga an hmalakna thenkhatte a sawi lang bawk.
Digital Payment Seminar-ah hian Biju Majumdar, NPCI; Pu JM Dawnga Chhangte, Deputy Manager SBI; G.Ratnagar, DGM, BSNL; Sanjeev Chhetri, VMSL; Pi KC Lalramchuani, Bharti Hexacom Ltd leh Pu Vanlalmuana, Reliance Jio ten presentation an nei a. Sawihona hun hman zui a ni bawk.
