Vawiin khan Art and Culture Department bul tuma Mizo Academy of Letters (MAL) buatsaih State Level Seminar on Nationalism in Mizo Literature chu Conference Hall, Department of Economics and Statistics-ah neih a ni. He seminar hawnna kaihruaitu Prof. Laltluangliana Khiangte chuan inlawmna thu a sawi pahin Mizo tana Nationalism hnam thinlung pawimawhna sawi hawngin Mizo thu leh hlaa a lanchhuah dan hrang hrang zir zau pawimawhna a sawi. 

He Seminar hi Inthlanpui a hnaih tawh vanga huaihawt a nih loh thu leh hun rei tak atang tawha nei tura ruahmanna neih a nih thu a sawi a. Dr. Rualkhuma Colney, Secretary MAL chuan MAL chetvelna leh hmalakna hrang hrang te sawiin, Life member 44 an awm thu leh donor member leh Member thahnem tak an awm thu a sawi bawk. Kum 1964 MAL din tirh a thu leh hla rawngbawlna pawimawh tak an neih an la kalpui zel Thu leh Hla chu vawiin thleng hian ala chhuah chhunzawm zel thu pawh a sawi bawk. Heng bakah hian MAL hian Mizo Academy Award chu kum thum danah Mizo ziakmi kutchhuak nei tha zingah pek a ni thin a; tin Book of the Year lawmman pawh kum tin Mizo tawng a chhuak lehkhabu tha ber hnenah hlan a ni bawk.

He seminar a khuallian Pu Lalduhthlana Ralte IFS (Retd), Chief Information Commissioner Mizoram chuan he huna khuallian a ni thei chu lawmawm a tih thu leh nationalism hi Mizo tan a pawimawh a tih thu a sawi a. Mizo Nationalism hi pawn lam atanga kan tlir hian a dang deuh em aw tih chang a neih thu leh hun tam zawk Zoram pawna hmang  nih thu a sawi a. Nationalism hi kan hman danah ram leh hnam kan huam tir a vang hian kan buai deuh em aw tih ngaihtuahna pawh ka nei fo thin thu te, Nationalism hi hnam thinlung ang a kan sawi chuan kan thinlung pawh kan inennawn fo a ngai dawn nia a hriat thu pawh sawiin, nationalism leh patriotism hi kan lak kawp chuan kan buai dawn a, kan insawr zim lutuk chuan kei mahni ngei pawh hi kan la buai thei dawn a hriat thu a sawi bawk. Khuallian chuan khawvel hi cosmopolitanism lam zawngin a kal nasa hle tawh mai a, nationlism hi kan ngaihtuah that pawh a ngai niin a lang. Kan tawng leh kan sakhua hi Mizo min nih tirtu ber pakhat a nih avangin kan tawng leh kan sakhua hi a ral chuan kan Mizona hi a ral mai dawn a ni. Thuhnuai rawlhna te leh tlawmngaihna te hi nationalism min petu pawimawh tak a nih avangin chhawm nung zel turin tan kan lak a ngaih a.  lnlungrual lohna leh harsatna te pawh a awm a ni thei e, hetiang sawihona hun tha kan nei thei hi lawmawm a tih thu a sawi bawk. 

He seminar ah hian mithiam hrang hrang sawm bik ten paper an buatsaih chu zirho a ni a. MAL member, sawm bik te bakah College zirlai, ICFAI University leh  Mizoram University a MA (Mizo) zirlaiten he hun hi an chhim bawk a  ni.