DIG (Southern Range) kal chhuak tur Pu L.H. Shanliana, IPS chuan vawiin khan Lunglei-a tlawmngai pawl hrang hrang - MUP, YMA, MHIP, MZP, MSU, Chhimbial Chhantu te leh MJA Lunglei te chu Lunglei SP Office Conference Hall-ah thingpui inhopuiah sawmin Dan leh thupek kenkawh chungchanga Police-te hmalakna leh mipuite tana hriattur  pawimawh thil hrang hrang a sawipui a ni.

DIG(SR) chuan Southern Range huam chhungah sorkar hmalakna hrang hrang a tarlante zingah Tuipang, Sangau leh Borapansury Thana-te chu cheng nuai 73 chuang theuh estimate niiin sak tan mek a nih thu leh Lunglei, Tlabung, Vasei leh Bungtlang(S)-ah te Thana sakna tur pawh sanction a awm vek tawh thu a sawi a. Lunglei khawpui chhungah Police Quarter sak nan cheng nuai 500 sanction a nih thu a sawi bawk. Lawngtlai bul, Thingkah ramah 3rd IR Bn. Hqrs. sakna turin cheng vaiblechhe 28.42 sanction tawh a ni bawk a. A zavaiin Southern Range - Lunglei, Lawngtlai leh Saiha District - chhunga Police Department tana infrastructure development hnathawh mek chu cheng vaibelchhe 40.03 a ni.

DIG chuan District 3 - Lunglei, Lawngtlai leh Saiha - ah dan leh thupek kenkawh chungchangah a lungawithlak thawkhat tih a sawi a, tun hnaia MLA leh MP inthlan neih taka mipui vantlang leh tlawmngai pawl te nen thawhhona tha tak an neih theih avangin buaina leh harsatna awm lovin inthlan pawh tha taka zawh a nih avangin lawmthu a sawi a. Southern Range hnuaia Police dinhmun chu sawilangin tun dinhmunah hian Lunglei District-ah Police 388 awm turah 322 awmin post ruak 66 a awm a; Lawngtlai District-ah 227 awm turah 187 awmin post ruak 40 leh Saiha District-ah 265 awm turah 214 awmin post ruak 51 a nih thu DIG chuan tarlangin, post ruak hnawh khah theih loh a nih avangin Police Station tinah indaihlohna a awm vek thu a sawi a ni.

DIG(SR) chuan thu a sawi zelnaah Democracy ramah chuan mipui ten lungawi lohna lantir nan leh thil ngen nan kawng hrang hrangin sorkar an nawr thin a, chutiang hunah pawh mipuiten an hriatreng tur chu mipuite chhiah tlingkhawma lei/sak sorkar building, bungrua leh motor te hi tihchhiat tur a ni lova, mipui nawlpui chak lakna ber National Highway danchahte phei chu tih hauh tur a ni lo, a ti.

DIG(SR) Pu L.H. Shanliana hian kum 1 leh thla 8 (19.12.2012 - 31.8.2014) chhung DIG(SR), Lunglei charge a lak chhungin Bangladesh border-a police station awm zawng zawng a tlawh chhuak vek hman a; Saiha leh Lawngtlai lamah tum 2 SP Office leh Thana a tlawh bawk a ni. DIG(SR) Lunglei anga a awm chhungin a thawhpui District tina Police te leh 2nd MAP ten tha taka an tawiawm avangin lawmthu a sawi bawk. DIG hian thla thar atangin Itanagar, Arunachal Pradesh-ah DIG Post bawk a han zawm dawn a ni.

Vawiina inkawmhonaa lo kal tlawmngai pawl leh MJA aiawhten DIG(SR) chu an thawhho thinnaah lawmthu hrilhin a kal zelnaah duhsakna an hlan bawk a ni.