Dikna phochhuak turin Sawrkar Ukil te in pawimawh a ni. He thu hi vawiina Aijal Club-a Sawrkar Advocate-te meeting-a Law & Judicial Minister Pu Lalsawta sawi a ni. Meeting ah hian Parliamentary Secretary Pu K S Thanga pawh telin Pu Singthanga, Secretary, Law & Judicial Department chuan meeting hi a kaihruai a, District hrang hranga Sawrkar Advocate te an tel kim hle a ni.

Law & Judicial Minister chuan kan Sawrkar thuvawn, Amosa 5:24 - ‘Dikna chu luipui angin luang sela, felna chu luipui kang ngai lo angin luang rawh se’ tih hi a taka chantir tur chuan Court rorelnaa innghat tlat a ni a. Chuvangin, kan Sawrkar Ukil-te hian mipui thlavang in hauhnaah leh dikna kenkawhna kawng hrang hrangah hna in thawk tha hle a, taima lehzual tur leh inzir chho zel turin vawiinah hian ka chah bawk che u a ni, a ti.

Pu Lalsawta chuan tualthahna te, pawngsual leh pawikhawihna dang a thlenin thuhretute’n huai leh ngaihngam taka Court-a thudik an sawi theih nan thuhretute hi in ngaih pawimawh a tul em em bawk a. An thenawm leh chhungkhat laina hnaite ngei pawh, an pawikhawih anga hrem an nih nana mi huat pawh ngaihtuah chang lova thuhretute hi in tan mi pawimawh, VIP an ni. Chuvangin, an tan thawhpui nuam tak in nih a ngai a ni, a ti.

A sawizel naah Minister chuan Mizoram hi chenna tlak, ram nuama siam zui zel tur chuan misual leh pawikhawih hmangte kan dan chep a, an phu tawka hrem an nih ngei nan Court rorelnaah Sawrkar hian hnehna kan chan a ngai fo thin a ni, a ti.

Pu Lalsawta chuan ram rawng an bawlna hi langsar lovin mi fak hlawh kher lo mahsela, an thinlung chhungrilah ram leh Pathian rawng an bawl tih inhria a, hmasawn chho zel tur leh taimak chhuahzel turin duhsakna sang ber a hlan a ni.

Parliamentary Secretary Pu KS Thanga pawhin thusawiin Sawrkar Ukil te chuan hamthatna nei tha lo chungin thahnemngai taka an thawk chu lawmawm a ti.

Sawrkar Ukil-te hian Minister, Parliametary Secretary leh Law & Judicial Deaprtment aiawhte hovin an harsatna leh an hnathawhnaah tul nia an hriat te an sawiho a ni.