Vawiin khan Thingfal MZP Branch buatsaihin Thingfal Community Hall-ah 'Teacher's Day' lawmna neih a ni a, Lunglei HPC Vice-Chairman Pu S. Laldingliana chu Khuallian niin zirtirtute chawimawina hun hi a hmanpui a ni.

He Teacher's Day lawmna inkhawm Thingfal MZP President Lalmuanawma kaihhruaiah hian Khuallian Pu S. Laldingliana chuan zirtirtu zawng zawngte chibai bukin 'Zirtirtute Ni' chu inpek tharna ni atan hmang turin a chah a. Zirna lamah tun hmain mithiam tam tak chhimlam atangin an chhuak thin a, tunah erawh zirna lamah kan hnufual ta chu tanlak a ngai tak zet a; hemi kawngah hian zirtirtute leh zirlaiten mawhphurhna sang tak an nei a ni, a ti. Zirtirtute chu hlawh lakna atan chauh hmang mai lova zirlaite tana inpekna tak tak nen zirtirna pe turin a chah. Zirtirtu hi hna zahawm a ni mai piah lamah rawngbawlna kawnga 'missionary' ropui tak thawktu an ni tih hre reng turin fuih bawk a ni.

Teacher's Day lawmna inkhawmah hian Thingfal khawchhunga zirtirtute chu Khuallian hian chawimawina thilpek hlanin, zirlai tithate chawimawina thilpek a hlan bawk a ni. HPC Vice-Chairman PU S. Laldingliana hi MJA Lunglei hruaitu engemawzat ten an tawiawm a ni.