Lunglei-a cham mek Education Parliamentary Secretary Pu Joseph Lalhimpuia chuan vawiin khan Lunglei DIET a tlawh.

Parliamentary Secretary Pu Joseph Lalhimpuia chuan DIET officers leh staff te hmaah thusawiin RTE hnuaiah India sorkarin zirtirtute a ngai pawimawh a, chuvangin zirtirtu hna thawk tur te chu Teachers Eligibility Test paltlang a, training pek leh an ni thin a, hei hian zirtirtute dinhmun a ti hlu zual a ni, a ti. DIET Lunglei hnuaia training mekte awmna tur Hostel pawh Cheng nuai 216.31 senga sak a nih thuai tur thu a tarlang bawk.

Sorkar Laipuiin kum 2015 hmain zirtirtu zawng zawngte chu training pek vek tur a tih laiin Lunglei DIET Principal & staff, SSA leh Education Department-te thahnemngaihna avangin hun leh hmun chep tak karah building pawh sak zawh hmain, zirtirtu tumah ban an nih loh nan theihtawp chhuahin teacher's training an buatsaih zel a, Lunglei District chhunga zirtirtute chu an vanneih hle a ni, a ti.

Zirlaite chu an zirna piah lamah an taksa hriselna ngai pawimawh tura zirtir a pawimawh thu sawiin parliamentray Secretary Pu Joseph Lalhimpuia chuan 'Fit People, Fit Nation' thuchang chawiin physical education kalphung pawh her danglam a nih tur thu a sawi a. Sorkarin zirtirtu indaihlohna hre rengin MPSC kaltlangin zirtirtu 36 lak tum a nih thu a sawi a, Govt. Lunglei HSS chu zirlai naupang an ngah avangin zirtirtu lak thar tur zinga 7 chu pek an ni ang, a ti bawk.

DIET Lunglei Principal Pu H. Lalzarliana chuan tun dinhmunah Lunglei DIET-ah zirlai 409 an awm mek a, zirtirtu 12 awmin Senior Lecturer 3, WE zirtirtue 2 leh Hindi zirtirtu 2 an awm bawk a ni tih a sawi a. DIET Principal, Staff leh trainees te aiawhin Parliamentary Secretary Pu Joseph Lalhimpui hi thilpek a hlan a; DIET zirlaiten an zirtirtute chawimawina thilpek an hlan bawk a ni.