No.7122/2020-2021

Vawiin chawhnu dar 2 khan khan District Information & Public Relations Officer Dr. Lallawmkima hovin DIPRO Office Champhai thawktute leh MJA Champhai District member-te chuan I&PR Conference Hall, CHANEM Building-ah kumthar pual inhlantharna hun an hmang.

Inhlantharna puala thuchah a sawiah  Dr.Lallawmkima chuan kum kalta hun harsa tak karah pawh media mi leh sa te’n theihtawp chhuaha an mawhphurhnate zo taka an hlen thin leh  sawrkar an tawiawm chu fakawm tiin, hun khirh leh harsat hun lai ber pawha rinawm taka mipui rawng an bawl thin chu chhuanawm a tih thu a sawi a. Mipuite  rawngbawl kawngah Champhai district Chanchinbumi te’n tha taka sawrkar an tawiawm thinnaah lawmthu sawiin, hun kalzelah pawh inpawh leh thahnemngai taka kan thawhho zel ka beisei tlat a ni, a ti a. Media mite chu kum bul tha taka tan tum tur leh  mahni mawhphurhna theuhte dik leh felfai taka hlenchhuah tum fo thin turin a fuiha, mipui te’n thu dik ziktluak chauh an hriat theihna turin intuaihriam zela, tun aia taima zual sauh sauh tur leh mahni ngei pawh a theih chinah thutharte finfiah thei tura che chhuak thin turin a chah a. Sawrkarin Chanchinbumite hmakhua ngaiin hma a lak fo tawh thin thu leh tan a lak chhunzawm zel dawn thu a sawi bawk. 

Pu Lalhmingmawia Pachuau, President MJA Champhai District chuan hun thar chuankai rualin hmasawn tumin eng ngaihtuahna thar nge kan neih ang tih inbihchian a tul thu a sawi a.  Kalkhawmte chu mahni eizawnna theuhah Pathian hrereng chungin rinawmna leh dikna changvawna, midang tana malsawmna nih tum tura tanla zel turin a chah a. MJA Member-te chu finchhuah ngaihnaahte an inhawn reng  thu a sawi bawk.

Vawiin inhlantharna hun hi Pu Lalhmingmawia Pachuau, President MJA Champhai District chuan a kaihruaia.  Pu Lalnunsanga Fanai, EM, MJA Champhai District chuan  hunserh  a hmang a. A duh apiang tan thusawina hun hawn  a ni bawk. 

MJA Champhai district-ah hian member 15 awm mekin heng zinga 12-te hi Accredited Journalist an ni a. Tun dinhmunah Undivided Champhai District chhungah Daily Newspaper panga leh Local Cable TV pahnih a awm mek a ni.

Attachment

  • Loading attachment...