No.7121/2020-2021
Pu T.J. Lalnuntluanga, Minister of State, Environment Forest & Climate Change kaihhruaina hnuaiah vawiin khan PCCF Conference Hall-ah State Level Sub Committee on Fire Prevention an thukhawm.
Vawiin meeting ah hian agenda hrang hrang 1) Nikum 2020 lama hmalakna leh dinhmun thlirletna ; 2) Fire Prevention Week 2021 leh Week hawnna chungchang ; 3) Lo hal hun bithliah chungchang ; 4) Kangmei ven kawnga hmalak dan endik (monitoring) chungchang ; 5) Fire Prevention Award : 6) Fire Prevention Awareness campaign/activities ; 7) Ram kang pumpelh leh kangthelh chungchangte ngaihtuah a ni.
Kumin hian Fire Prevention Week hi February 8 - 13, 2021 chhunga neih tura rel a ni a. March ni 15 aia tlai lovah Lo hal vek tura rel a ni. Lengpui Airport chhehvel khuaten chawhnu dar 3 hnu lamah chauh Lo/Huan hal tura hriattir ni se tih rel a ni bawk.
Nikum ah District tin ten ram kang ven kawngah theih ang tawkin hma an la a. Mei kawng (fireline) thar km. 130 a thui sial a ni a, a hma kuma mei kawng sial sa km. 130 vel tihfai/sial that a ni bawk a. Fire watcher mi 150 thla 4 chhung rawih an ni bawk. Covid 19 hri leng avangin fire season tawp lamah duh angin hma a lak theih ta lova. Monitoring team te pawhin District tina kangmei ven kawnga hmalakna an endik thei ta lo bawk a, a pawi an ti hle.
Kum 2020 ah hripui leng avangin Lo neih tum lem lo, tlai khawhnu-a Lo vat chawp leh chul rit an tam hle a, Lo hal hun bituk pawh zawm hleih theih a ni lo a. Hei vang hian kangmei chhuak (Lo hal) zat pawh a tam phah niin a lang. Forest Survey of India (FSI) in satellite kaltlanga Mizoram chhunga fire points a hmuh pawh kum hmasa lam aiin a tam phah hle a, a vaiin Mizoramah nikum a fire points hmuh zat hi FSI website-a tarlan danin 7381 lai a ni.(Lo hal hnu-a cha chheh khat lek halte, bawlhhlawh hal te leh kangmei chhuak hrim hrim hi fire point hran zel angin satellite hian a chhinchhiah ni. Ramkang thenkhat chu a kikawi leh zau dan azirin satellite hian fire point 6 laiah te pawh a hmu thin bawk. Kangmei chhuak satellite in a hmuh zawng zawng hi a hmunah endik vek sen a ni lova. A hmuna endik chin (70 % vel) report atangin Mizoram a kangmei chhuak zat hi (Lo/huan hal tiamin) a vaiin hmun 1300 ah 3614 Ha. a zau a ni a, chumi zinga hmun 210 a mi Ha. 289 a zau chu ram kang (forest fire) a ni a, hmun 1090 ami Ha. 3325 a zau chu Lo hal te, cha hal (debris buring), bawlhhlawh hal te leh kangmei chhuak hrim hrim te an ni.
