No.6345/2020-2021
COVID-19 no Tolerance Fortnight chu 26.10.2020-09. 11.2020 chhung hian kalpui tur a ni a, hei hi COVID- 19 avanga khuahkhirhna siam te mipuiin nunphung thlak danglam khawpa an hman theih nan a ruahman a ni. Chutih rualin, COVID-19 chungchanga himna lam inzirtirna — Jan Andolan Campaign kalpui mek a nih avangin, he hun chhung hian mipui zirtirna tam thei ang ber kalpui tur a ni.
Chutih lai mekin, COVID- 19 kai hmuhchhuah thar zingah kai chhan leh kaina tur awm hriat chian loh an pun tak zel avangin ‘Community Spread (khawtlanga hri darh) hi a awm tan tawha ngaih a ni. He ‘Community Spread’ hi dan chah a nih theih nan ni 15 (sawm leh panga) chhung ’COVID-19 No Tolerance fortnight’ hman tur a ni a, hemi hun chhung hian Sawrkarin dan a siam, The Mizoram (Containment and Prevention of the Spread of COVID- 19) Act, 2020 in mipui te zawm tura a tih te leh Sawrkar thupek dangte khauh taka kenkawh tur a ni.
Chuvangin, a hnuaia tarlan khuahkhirhna te hi Unlock 4.0 Order dated 30.09.2020 chu siamremin, he hun chhung hian hman a ni ang.
‘COVID-19 No Tolerance Fortnight’ hian 26.10.2020 atanga 09.11.2020 thleng a awh dawn avangin Unlock 4.O Order dated 30.09.2020-in inkaihhruaina dang a siam te pawh ni 09.11.2020 thleng hman chhunzawm a ni ang.
1. Clause C (1) chu a hnuaia tarlan ang hian tihdanglam a ni.
‘Head of Department/ Head of Office ten thawktu 70% chu a inchhawkin office an kal tir ang. Thawktu 30%, kum lama la naupang deuh leh hrisel zawk te chu ‘COVID-19 No Tolerance Fortnight’ chhunga DDMA te tha tichak turin mahni district-a Deputy Commisioner theuhvah ‘COVID-19 Executive Duty’ atana hman turin an hming list leh nihna kimchang an thehlut anga, anni hian anmahni office-a kal lovin ’COVID-19 Executive Duty’ hna hemi hunchhung hian an thawk ang. Thawktu zinga kum lama upa, natna benvawn nei, naupai, adt. te chuan in lam atangin hna an thawk ang.
Tin, Head of Department/ Head of Office ten COVID- 19 laka inzirtirna — mask vuah, inkarhlat taka awm (social distancing), kut silfai/tih thianghlim ngun, etc. chungchang tarlanna poster/ banner tam thei ang ber an office hmunhma ah mipui vantlang inzirtina atan an kalpui ang.’
2. Clause F(1) chu a hnuaia tarlan ang hian tihdanglam a ni.
‘School, college leh educational/ coaching institute te chuan online hmang chauhin zirtirna an kalpui tur a ni. Zirtirtute rawn tura school kal pawh khap a ni.
Tin, he hapta hnulama zirna in hawn chungchang chu State Disaster Management Authority, Mizoram in School Education Department leh Health & Family Welfare Department thurawn a zirin a ngaihtuah chauh ang.’
3. Clause F (5) chu a hnuaia tarlan ang hian tihdanglam a ni:
‘Games & sports tournament huaihawt khap a ni a, games & sports practice-na hmun — indoor-ah chuan mi 10 leh outdoor-ah mi 25 aia tam awmkhawm phal a ni lo.’
4. Clause F (6) hnuaia hawn phal loh te zingah picnic spot belh a ni.
5. Clause F(7) chu a hnuaia tarlan ang hian tihdanglam a ni.
‘Mitthi vuina leh inneihna (man hlan/inneih inkhawm leh reception) ah te chuan mi 35 (sawmthum panga) chin punkhawm phal a ni. Lungphun, anniversary, pawl thila kalkhawmna, book release adt. ah te chuan mi 20 (sawmhnih) aia tam punkhawm khap a ni. Heng hmuna tel te chhinchhiahna kimchang (hming, address, phone number leh kal hun te) ziahna bu register chu a huaihawttu ten an vawng tur a ni.
Hei hian Disaster Management & Rehabilitation Department in phalna alo pek tawh te a huam lovang a, amaherawhchu, District Disaster Management Authority ten phalna neia hunpui an hmanna hmunah te ‘No Tolerance Fortnight’ hi khauh takin an kengkawh thung ang. Dan bawhchhiatna a awm chuan ngaihhnathiamna awm lovin hremna lekkawh tur a ni.
6. Clause H (2) hnuaia hawn phal te zing atangin gym paih a ni.
7. Section II: ‘Aizawl Municipal Area Bika Lirthei Veivah dan tur’ ah a hnuaia tarlan hi belh a ni:
“COVID-19 No Tolerance Fortnight’ chhung hian Superintendent of Police (Traffic), Aizawl in Traffic No Tolerance Drive’ a kalpui bawk ang.
8. Section V: Hremna Dan tih chu “Thupek Kenkawh leh Hremna Dan’ tia thlak a ni a, a hnuaia tarlan hi belh a ni bawk.
‘He thupek hi mipui vantlangin an zawm that leh that loh endik kawngah Disaster Management Act, 2005 in thuneihna a pek DDMA leh The Mizoram (Containment & Prevention of the spread of COVID- 19), Act 2020 in thuneihna a pek - Chairman/Vice Chairman/ Member Secretary, State Level Task Force, Chairman/Vice Chairman/ Member Secretary, District Level Task Force, Executive Magistrates, Police Officer Constable chin chunglam, Chairman/Vice Chairman/ Member Secretary, LLTF/VLTF te leh a bika Sawrkar hnathawk ‘COVID-19 Executive Duty’ atana ruat ten khauh taka kengkawhin an endik thin ang.’
